سجاول ۾ جيئي سنڌ قومي پارٽي پاران سنڌ دشمن منصوبن خلاف ريلي

سجاول (رپورٽر)جيئي سنڌ قومي پارٽي جي سجاول ضلعي پاران سنڌو درياهه جي پاڻي تي وفاقي قبضي ۽ سنڌ جي زمين تي ڪارپوريٽ فارمنگ جي نالي ۾ ٿيندڙ والار خلاف سخت احتجاجي ريلي ڪڍي وئي. ريلي ڊي سي آفيس سجاول کان نشتيل بينڪ چوڪ تائين نڪتي، جنهن جي اڳواڻي پارٽي اڳواڻن قادر بخش زئور، وقار ميراڻي، سجاد ميراڻي، ناٿو زئور، معشوق زئور، ارشاد شيخ ۽ قاسم ميراڻي ڪئي.سخت گرمي جي باوجود وڏي انگ ۾ پارٽي ڪارڪنن ريلي ۾ شرڪت ڪئي ۽ "سنڌو درياهه جي بحاليءَ" لاءِ جذباتي نعرا هڻندا رهيا. ڪارڪنن هٿن ۾ بينر ۽ پلي ڪارڊ کڻي رکيا هئا، جن تي وفاق خلاف نعرا لکيل هئا.احتجاجي مظاهري کي خطاب ڪندي پارٽي اڳواڻن چيو ته سنڌو درياهه سنڌ جي حياتيءَ جو وسيلو آهي، جيڪو ازل کان سنڌ جي ملڪيت رهيو آهي، پر بدقسمتي سان جڏهن کان وفاق پاران سنڌو جو پاڻي بند ڪيو ويو آهي، تڏهن کان لکين ايڪڙ زمين بنجر بڻجي وئي آهي. هنن چيو ته سنڌ جي زمين ڪارپوريٽ فارمنگ جي نالي تي قبضي هيٺ ڏني پئي وڃي، جيڪا سنڌ واسين جي حقن تي سڌي حملي جي برابر آهي.اڳواڻن چيو ته سنڌو درياهه جڏهن به مستيءَ سان وهي رهيو هو، سنڌ جا شھر ۽ ڳوٺ خوشحال هئا، پر هاڻ صورتحال ايتري خراب آهي جو سنڌ جي وڏي آبادي معاشي بدحالي جو شڪار ٿي رهي آهي. سنڌ جو هارين، آبادگارن، ۽ پورهيتن جو گذر سفر مشڪل بڻجي ويو آهي.پارٽي اڳواڻن خبردار ڪندي چيو ته جيڪڏهن وفاق پاران سنڌو درياهه تي غير منصفاڻي بندشون ختم نه ڪيون ويون ۽ زمينن جي والار جو سلسلو بند نه ڪيو ويو ته احتجاج جو دائرو وڌايو ويندو ۽ سخت قدم کنيا ويندا