جيئي سنڌ محاذ ڪراچي پاران گارمينٽس فيڪٽري آڏو 18 ڊسمبر تي ڌرڻي جو اعلان

ملير (رپورٽ: عبدالرشيد مورجھريو) جيئي سنڌ محاذ ڪراچي جي آرگنائزر ضمير حاجاڻو، ملير جي صدر فيض هيسباڻي ۽ ٻين اڳواڻن عوامي پريس ڪلب ملير ۾ پريس ڪانفرنس ڪندي چيو آهي ته سنڌي پورهيتن سان ناانصافيون ۽ سندن استحصال ڪنهن صورت برداشت نه ڪيو ويندو۔ اڳواڻن اعلان ڪيو ته ملير جي قاسم گارمينٽس فيڪٽري ۾ ڪم ڪندڙ پڪن سنڌي پورهيتن کي مبينه طور ڪچي ملازم ۾ رکي استحصال ڪرڻ خلاف 18 ڊسمبر تي فيڪٽري جي مک هگيٽ اڳيان وڏو ڌرڻو هنيو ويندو، جنهن ۾ وڏي انگ ۾ ڪارڪن شرڪت ڪندا هنن پريس ڪانفرنس دوران مطالبو ڪيو ته رتو ديرو ۾ بي گناهه قتل ڪيل معصوم حسنين حاجاڻو جي قاتلن کي فوري طور گرفتار ڪيو وڃي ۽ مقتول جي وارثن کي انصاف فراھم ڪيو وڃي۔ اڳواڻن جو چوڻ هو ته سنڌ ۾ وڌندڙ ظلم، ناانصافين ۽ مظلومن سان ٿيندڙ زيادتين خلاف خاموشي هاڻي ناممڪن آهي، تنهن ڪري قانون لاڳو ڪندڙ ادارن کي گهرجي ته فوري قدم کڻي ذميوارن کي قانون جي ڪٽهڙي ۾ آڻين جيئي سنڌ محاذ جي اڳواڻن وڌيڪ چيو ته سنڌي پورهيتن جي حقن لاءِ سندن جدوجهد جاري رهندي، ۽ جيڪڏهن 18 ڊسمبر تائين مطالبا پورا نه ڪيا ويا ته احتجاج جو دائرو وڌايو ويندو ۽ آئنده لائحه عمل جو اعلان ڪيو ويندو۔ هنن چيو ته سنڌي پورهيتن کي برابر حق، روزگار ۾ تحفظ، ۽ استحصال کان پاڪ ماحول فراهم ڪرڻ حڪومت ۽ ادارن جي ذميواري آهي، جنهن لاءِ هو تحريڪ کي وڌيڪ منظم ڪري اڳتي وڌائيندا۔