اداکار آر جے عمران کی مقبولیت کا گراف بلندیوں کی جانب گامزن، بڑی اور چھوٹی اسکرین پر مسلسل کامرانیاں

​کراچی (وسیم قریشی) ​شوبز انڈسٹری کے معروف اور ورسٹائل اداکار آر جے عمران کی فنکارانہ صلاحیتوں کے سبب ان کی مقبولیت میں نمایاں اور بے پناہ اضافہ دیکھنے میں آ رہا ہے۔ سینما گھروں میں دھوم مچانے والی کامیاب فلموں ’آگ لگے بستی میں‘ اور ’ذوم عید‘ کی شاندار پذیرائی کے بعد اب وہ مزید دو بڑی فلموں میں انتہائی اہم اور مرکزی کردار نبھاتے ہوئے نظر آئیں گے۔ فلمی دنیا کے ساتھ ساتھ وہ چھوٹی اسکرین پر بھی مسلسل کامیابیوں کے جھنڈے گاڑ رہے ہیں۔ ​ڈرامہ سیریل ”بس تیرا ساتھ ہو“ کی دھوم: آج کل آن ایئر بلاک بسٹر ڈرامہ سیریل ”بس تیرا ساتھ ہو“ میں اداکار ایک منفرد اور بااثر وکیل کے روپ میں اپنی جاندار اداکاری کے جوہر دکھا رہے ہیں، جسے شائقین کی جانب سے بے حد سراہا جا رہا ہے۔ اس حوالے سے میڈیا سے خصوصی بات چیت کرتے ہوئے آر جے عمران کا کہنا تھا کہ نامور ہدایت کار قاسم علی مرید نے سیریل کے ہر کردار سے انتہائی خوبصورت اور باکمال کام لیا ہے، یہی وجہ ہے کہ یہ ڈرامہ مسلسل مقبولیت کے نئے ریکارڈ قائم کر رہا ہے۔ ​نامور فنکاروں کی کہکشاں اور سیکھنے کا عمل: معروف ڈرامہ نگار سائرہ رضا کے تحریر کردہ اس میگا پروجیکٹ کے مرکزی کاسٹ میں فرحان سعید، ثناء جاوید، فرحان طاہر، صبا حمید، ٹیپو شریف، حارث وحید اور آر جے عمران شامل ہیں۔ ڈرامے کی کامیابی پر بات کرتے ہوئے انہوں نے مزید کہا کہ ’سکس سگما پلس پروڈکشن‘ جیسے معتبر ادارے کے ساتھ کام کرنا ان کے لیے ایک بہترین تجربہ ثابت ہوا ہے اور ان کاوشوں سے انہیں فن کی نئی باریکیاں سیکھنے کا زبردست موقع ملا ہے۔ ان کے بقول انڈسٹری کے میگا اسٹارز کے ساتھ اسکرین شیئر کرنا ان کے لیے انتہائی باعثِ اعزاز ہے۔ ​آئندہ پروجیکٹس اور مصروفیت: اپنے آنے والے کاموں کے حوالے سے گفتگو کرتے ہوئے آر جے عمران نے انکشاف کیا کہ وہ اس وقت اپنی زیرِ تکمیل دو نئی فلموں کی تیاریوں میں سخت مصروف ہیں، جن کی تفصیلی معلومات وہ جلد اپنے مداحوں کے ساتھ شیئر کریں گے۔ ٹی وی سیریلز کے علاوہ وہ ایک ویب سیریز کی تیاریوں میں بھی پیش پیش ہیں۔ ​بے پناہ مصروفیت کا ذکر کرتے ہوئے ان کا کہنا تھا کہ شوٹنگز کے باعث وہ آج کل اپنے اہل خانہ اور دوستوں کو مناسب وقت نہیں دے پا رہے، تاہم جب بھی انہیں مصروف ترین شیڈول سے کچھ وقت فارغ ملتا ہے تو وہ اسے اپنے گھر والوں کے ساتھ گزارنا پسند کرتے ہیں اور ان کی ہمیشہ یہ کوشش ہوتی ہے کہ وہ اپنے مخلص دوستوں کو بھی وقت دے سکیں۔