ايس پي ايس سي کي ڪرپشن جي منڊي بڻائي نوجوانن کان اميد کسي وئي : اياز لطيف پليجو

ميرٽ جو قتل ڪري نوڪريون وڪرو ڪيون پيون وڃن. نوجوانن جو استحصال سنڌ جو استحصال آھي

حيدرآباد (بيورو)قومي عوامي تحريڪ جي سربراھ اياز لطيف پليجي چيو تہ سنڌ پبلڪ سروس ڪميشن کي ڪرپشن جي منڊي بنائي نوجوانن کان اميد کسي وئي آھي.ميرٽ جو قتل ڪري نوڪريون وڪرو ڪيون پيون وڃن. نوجوانن جو استحصال سنڌ جو استحصال آھي.اياز لطيف پليجي چيو تہ 18 سالن کان بيڊ گورننس جي نتيجي ۾ سڄي سنڌ ۾ ڏوھاري ڪنھن بہ وقت ڪنھن کي بہ نشانو بنائي سگھن ٿا. پوليس سميت ھر کاتي کي ڦرلٽ جو ذريعو بنايو ويو آھي. آفيسرن کي قانون ۽ آئين موجب ڪم ڪرڻ ڏيڻ بدران ذاتي نوڪر ڪري ھلايو پيو وڃي. ذاتي مفادن لاءِ استعمال ڪيو پيو وڃي. سنڌ ۾ آئين ۽ قانون جي حڪمراني ناھي. ريساڻو، وڏيرڪو ۽ سرداري راڄ آھي. پوليس ۽ ٻين کاتن جا عملدار ڪمدار بڻيل آھن. پوليس جون مقرريون سياسي بنيادن تي ڪيون وينديون آھن، جنھنڪري سنڌ ۾ بدامني جو راڄ آھي.اياز لطيف پليجي چيو تہ ناجائز مھانگائي جي ڪري غريب عوام لٽجي رھيو آھي۔ ڪرپٽ حڪمرانن کي صرف پئسو گھرجي. آھي عوام جي تڪليفن کان لاتعلق آھن.حڪمرانن جون معاشي پاليسيون غريب عوام کي مھانگائي ۽ ظلم جي گھاڻي ۾ پيڙي رھيون آھن ملڪ ۾ ڦرلٽ جو نظام ھلي رھيو آھي۔ سرمائيدار، امير ۽ حڪمران طبقو سمورن وسيلن تي قابض آھي.اياز لطيف پليجي چيو تہ ملڪ جي ترقي، غربت، ڪرپشن جي خاتمي ۽ شفافيت سان ملڪ اڳتي وڌندو. آئي ايم ايف جي ھدايت جوڙيل معاشي پاليسيون عوام دشمن آھن. عالمي مالياتي ادارن جا مفاد اسان جي معيشت جي چيلھ ڀڃي رھيا آھن. اسان کي پنھنجي آزاد خودمختيار پاليسيون جوڙي اڳتي وڌڻو پوندو. ٻاھرين ڊڪٽيشن کي جيئن جو تيئن قبول ڪرڻ سان اسين ٻين ملڪن کان پوئتي آھيون.