نوشهروفيروز ۾ محرم الحرام دوران بجلي جي بندش خلاف احتجاجي مظاهرو

شهرين توڙي عزادارن پاران بجلي جي اڻ اعلانيل لوڊشيڊنگ خلاف ٽائر ساڙي احتجاج ڪيو ويو

نوشهروفيروز (ڊ ر) ايامِ عزا دوران حيسڪو پاران رات جي وقت بجليءَ جي ڪنھن به قسم جي لوڊشيڊنگ نہ ڪرڻ واري ڪيل واضح اعلانن جي باوجود رات جي وقت شھر جي اڪثر علائقن ۾ بجليءَ جي ڊگهي لوڊشيڊنگ وارو سلسلو گذريل ٽن راتين کان مسلسل جاري آھي جنھن سبب شھر جي مختلف علائقن مان روزانو شام کان فجر واري نماز تائين برآمد ٿيندڙ سمورا سالانہ ماتمي پڙ انداھين ۾ گشت ڪري رھيا آھن ۽ عزاداريءَ واري سالانہ قديم سلسلي کي ڄاڻي واڻي متاثر ڪرڻ وارو سلسلو جاري آھي۔ حيسڪو جي ذميوارن پاران شڪايتون نوٽ ڪرائڻ جي لاءِ جاري ڪيل نمبرن تي ڪوبه فون کڻڻ لاءِ ئي تيار ناھي جڏھن ته ڪجهه علائقن ۾ بجليءَ واري ٽرانسفارمر کي خراب ٿئي 5 ڏينھن گذري چڪا آھن،پر ڪو قدم ناهي کنيو ويو جنھن سبب نہ صرف علائقي ۾ پيئڻ واري پاڻيءِ جي سخت ترین قلت پيدا ٿي وئي آھي پر گذريل 3 راتين کان ايامِ عزا واري سلسلي ۾ روزانو شام کان نمازِ فجر تائين علائقي مان برآمد ٿيندڙ سمورا سالانہ ماتمي پڙ ٻاٽ اونداھيءَ، گندگي، غلاظت ۽ ھنڌ ھنڌ تي بيٺل گندي پاڻيءَ مان گذري رھيا آھن جنھن سبب عزاداريءَ وارو قديم سالانو سلسلو سخت متاثر ٿي رھيو آھي ۽ 5 ڏينھن کان جاري ھن افسوسناڪ صورتحال خلاف ھاڻي علائقي واسي احتجاجي طور روڊ بلاڪ ڪري ڌرڻا ھڻڻ تي مجبور ٿي رهيا آھن۔ عزادار رابطا ڪميٽي جي سرپرست زوار عبدالستار درس، حیسڪو پاران سڄي شھر ۾ جاري ھن انڌير نگريءَ جي سخت لفظن ۾ مذمت ڪندي چيو آھي ته ھن صورتحال ۾ نہ صرف سڄي شھر مان برآمد ٿيندڙ قديم سالانه ماتمي پڙن، مجلسن توڙي ماتمدارين وارو سلسلو سخت متاثر ٿي رھيو آھي پر ماڻھن کي نذر نياز توڙي سبيلون تيار ڪرڻ ۾ به سخت ڏکيائيون پاش اچي رھيون آھن جنھن سبب ھاڻي شھري توڙي عزادار حيسڪو خلاف احتجاج ڪرڻ تي مجبور ٿي رھيا آھن۔ ھن وفاقي وزير پاڻي ۽ بجلي توڙي حيسڪو چیف کان ھن سنگين صورتحال جو فوري سنجيدہ نوٽيس وٺي ھن اھم ترین مسئلي کي فوري طور حل ڪرڻ جو مطالبو ڪيو آھي۔