سڪرنڊ وٽنري يونيورسٽي جي شاگردن پاران مطالبن جي مڃتا لاءِ احتجاج

سڪرنڊ (رپورٽر) شهيد بينظير ڀٽو وٽنري يونيورسٽي جي شاگردن جو فيسن ۾ ڳاٽي ٽوڙ اضافي ، اسڪالر شپ نه ملڻ ، بيچلر ڊگري رجسٽر نه ڪرائڻ ۽ هاسٽل ۾ سهولتن جي اڻاٺ خلاف شاگردن پاران ڪلاسن جو بائيڪاٽ ڪري وٽنري يونيورسٽي جي مين گيٽ احتجاج ڪري ڌرڻو هنيو آهي. شاگردن نادر چانڊيو ، زوهير ڪيريو ، مظهر جمالي ، مير دانش لغاري ، ظهور احمد ڏاهاڻي ، حليم اوٺو ۽ ٻين شاگردن احتجاج ڪندي چيو آهي ته اسان غريب شاگرد آهيون يونيورسٽي ۾ ڪا به سهولت نه آهي ان باوجود 90 پرسنٽ فيسن ۾ اضافو ڪري اسان شاگردن جي مستقبل داءَ تي لڳايو ويو آهي. هنن چيو ته اسان جون بيچلرز ڊگريون به رجسٽرڊ نه ڪرايون ويون آهن. اسان غريب شاگرد آهيون وڌايل فيس ڪيئن ادا ڪري سگهنداسين. يونيورسٽي انتظاميه پاڻ ڳالهائڻ بجاءِ استادن کي موڪلي اسان کي سپليون لڳائڻ جون ڌمڪيون ڏئي رهيا آهن. هنن چيو ته حق جي ڳالهه ڪرڻ تي استاد اسان حراسان ڪري رهيا آهن. هنن وس وارن کان مطالبو ڪيو آهي ته فوري طور وڌايل ڳاٽي ٽوڙن فيسون گهٽايون وڃن ۽ غريب شاگردن کي اسڪالرشپ ڏنيون وڃن ٻي صورت ۾ روزانه جي بنياد تي يونيورسٽي جي مين گيٽ آڏو ڌرڻو هنيو ويندو.