ٺٽي ۾ نامياري تعليمدان، ڪهاڻيڪار، شاعر آصف قريشي جي ٽئين ورسي ملهائي وئي

سنڌ ڪلچرل فورم ضلعي ٺٽو پاران مڪلي ۾ آصف قريشي جي آخري آرامگاهه تي حاضري ڀري ڀيٽا پيش

ٺٽو (ڊ ر)نامياري تعليمدان، ڪهاڻيڪار، شاعر ۽ سماج سڌارڪ سائين آصف علي قريشي جي ٽين ورسي جي موقعي تي سنڌ ڪلچرل فورم ضلعي ٺٽو پاران مڪلي ۾ سندس آخري آرامگاهه تي گلن جي چادر چاڙهي کيس ڀيٽا پيش ڪئي وئي۔ ان موقعي تي سنڌ ڪلچرل فورم جي باني چيئرمين صادق لاکو، سينيئر وائيس چيئرمين محمد شريف جاکرو، وحدت نيٽ ورڪ جي سرواڻ محمد ابراهيم هيجب، ايس آر ڊي ايس جي صدر قادر بخش اوٺو ۽ ٻين ساڃاهه وندن چيو ته آصف علي قريشي سنڌي ٻولي، ادب ۽ فنون لطيف جي ميدان ۾ هڪ متحرڪ ڪردار رهيو۔ هن “سارنگ سودائي” جي نالي سان بهترين ڪهاڻيون لکڻ سان گڏ معياري شاعري پڻ ڪئي۔ هنن وڌيڪ چيو ته مرحوم ٺٽو ۽ سجاول ضلعن ۾ تعليم، ادب ۽ سماجي شعور جي واڌاري لاءِ اهم خدمتون سرانجام ڏنيون ۽ ذاتي طور هڪ نفيس، بلند اخلاق ۽ ٻين جي همت افزائي ڪندڙ شخصيت جو مالڪ هو۔ ان موقعي تي نوجوان شاعر ڪاشف علي قريشي چيو ته سائين آصف علي قريشي هن خطي ۾ تعليم ۽ ادب لاءِ نمايان ڪم ڪيو، جڏهن ته سنڌ ڪلچرل فورم پاران هر سال ورسي ملهائڻ قابلِ تحسين عمل آهي۔ تقريب ۾ ٻين سميت شهزاد علي لاشاري، دادا رمضان خاصخيلي، لطيف صادق ۽ شهباز علي جاکرو پڻ شرڪت ڪئي۔