ملير: شهيد ذوالفقار علي ڀٽو لا ڪاليج مراد ميمڻ ۾ سچل سامي آڊيٽوريم هال جو افتتاح

سچل سامي آڊيٽوريم هال جي افتتاحي تقريب ۾ مختلف شعبن سان واسطو رکندڙ شخصيتن جي شرڪت

ملير (رپورٽ: عبدالرشيد مورجھريو) شهيد ڀٽو لا ڪاليج مراد ميمڻ ۾ نامياري شاعر سچل سامي جي نالي سان منسوب آڊيٽوريم هال جي افتتاحي تقريب منعقد ڪئي وئي جنهن ۾ ڊاڪٽرن، وڪيلن، صحافين، سول سوسائٽي جي نمائندن ۽ مختلف شعبن سان واسطو رکندڙ معزز شخصيتن وڏي انگ ۾ شرڪت ڪئي تقريب ۾ رٽائرڊ جسٽس حسن فيروز، رٽائرڊ جسٽس شاهنواز طارق، ملير پريس ڪلب جي صدر صدرالدين شيخ، سينيٽر ڊاڪٽر ڪريم خواجه، پيپلز ڊاڪٽرز فورم جي صدر ڊاڪٽر محمد بخش ڏاهڻي، سنڌ بار جي ميمبر رياض ڀٽي، جهانگير رائوجو ۽ ٻين اهم شخصيتن شرڪت ڪئي ان موقعي تي شهيد ڀٽو لا ڪاليج جي پرنسپل ايڊووڪيٽ رياض بلوچ لنڊ مهمانن جو شڪريو ادا ڪيو ۽ کين اجرڪن جا تحفا ۽ اعزازي ايوارڊ پيش ڪري سندن عزت افزائي ڪئي تقريب کي خطاب ڪندي مقررن چيو ته اڄ شاگردن جي محنت، لگن ۽ تعليمي ڪاميابين کي ڏسي بيحد خوشي محسوس ٿي رهي آهي. هنن چيو ته جنهن علائقي ۾ هڪ وقت جهيڙا ۽ تڪرار هوندا هئا، اتي اڄ هڪ معياري لا ڪاليج قائم آهي، جنهن جي بدولت ملير جا نوجوان تعليم حاصل ڪري وڪيل، جج ۽ ٻين اهم عهدن تي پهچي رهيا آهن مقررن چيو ته پاڪستان پيپلز پارٽي پاران شهيد ڀٽو لا ڪاليج جو قيام ملير واسين لاءِ هڪ اهم تحفو ثابت ٿيو آهي، جيڪو اڄ نوجوانن جي روشن مستقبل جي ضمانت بڻجي چڪو آهي هنن وڌيڪ چيو ته ملير جي تعليم يافته نوجوانن جو هڪ وڏو خواب پورو ٿيو آهي ۽ اميد آهي ته شهيد ڀٽو لا ڪاليج مان تعليم حاصل ڪندڙ ڪيترائي شاگرد مستقبل ۾ وڪيل، جج ۽ قانوندان بڻجي نه رڳو ملير پر سڄي ملڪ جو نالو روشن ڪندا.