ڪراچي ۾ سنڌ انٽيليڪچوئل فورم پاران پروفيسر اعجاز قريشي جي مان ۾ آجياڻو

پروفيسر اعجاز سنڌي، اردو ۽ انگريزي ٻولين ۾ 50 ڪتاب ڇپجي چڪا

ڪراچي (اسٽاف رپورٽر) پروفيسر اعجاز قريشي علمي، ادبي ۽ سياسي لحاظ کان مسلسل جدوجھد جو اھڃاڻ آھي، جنھن سنڌ جي سياسي تاريخ جھڙوڪ “ون يونٽ ۽ سنڌ”، “ ڪراچي جو ڪيس”، “4 مارچ ۽ سنڌي شاگرد جدوجھد”، “ ڪراچي جي تاريخ جي ورقن مان” ، “اچو تھ نئين سنڌ جي تعمير ڪريون”، “ سنڌي ٻولي بابت مقالا ۽ مضمون”، سنڌ اتھاس جي آرسي ۾”، “جديد سنڌ جي شعور جو اڻ ھار” ۽ جڳ مشھور ليکڪا ارون ڌتي راءِ جي ڪتاب “تخيل جوموت” جو سنڌي ٻوليءَ ۾ ترجمو، ان کانسواءِ سنڌ جي عظيم انسان “ سيد غلام مصطفيٰ شاھھ”، ڊاڪٽر سليمان شيخ”، “قاضي فيض محمد”، “ڪامريڊ غلام محمد لغاري جي شخصيت ۽ جدوجھد” تي ڪتاب لکي تمام وڏو ڪم ڪيو اٿائون. ھن جا سنڌي، اردو ۽ انگريزي ٻولين ۾ 50 ڪتاب ڇپجي چڪا ۽ ڪافي مواد اڻ ڇپيل آھي، پر ھاڻي بھ مسلسل ڪم ۾ رڌل آھي، اھڙو اظھار سنڌ انٽيليڪچوئل فورم پاران مقامي ھوٽل ۾ سندس مان ۾ منعقد ڪيل مڃتا تقريب ۾ شريڪ ٿيل دوستن کيس ڀيٽا پيش ڪندي ڪيو. انھيءَ موقعي تي عبدالصمد ميمڻ کي سندس صحتيابي تي شريڪ دوستن مبارڪون پڻ ڏنيون، تقريب ۾ محمد اسلم بلوچ، ڊاڪٽر عبدالرحيم سومرو، ابوبڪر مدني، امان اللھ شيخ، وڪيل منظور احمد کوسو، روزاني ھلچل جي چيف ايڊيٽر يونس مھر، ترقي پسند مصنفين سنڌ جي صدر رياض شاھد دايو، پروفيسر بدر سومرو، سينئر صحافي سھيل سانگي، شعيب بڪڪ، اڪبر ملڪ، نوجوان وڪيل عزيز کوسو، سگا اڳواڻ ذوالفقار انڍڙعبدالواحد سومرو، تعليم کاتي جي ايڊيشنل سيڪريٽري ۽ محقق مختيار ملاح، ڊاڪٽر وجي آھوجا پڻ شرڪت ڪئي.