پرڏيهه ۾ ويٺل سنڌي سنڌ جي تعليم، صحت، روزگار لاءِ ڪردار ادا ڪن: اياز لطيف پليجو

اياز لطيف پليجو ثقافتي ڏينھن جي حوالي سان پروگرام ۾ شرڪت لاءِ جاپان جي شھر اوساڪا پھچي ويو

اوساڪا(م ڊ) قومي عوامي تحريڪ جو سربراھ اياز لطيف پليجو سنڌي ايسوسيئيشن آف جاپان جي دعوت تي ثقافتي ڏينھن جي حوالي سان پروگرام ۾ شرڪت لاءِ جاپان جي شھر اوساڪا پھچي ويو. اوساڪا ايئرپورٽ تي سنڌي ايسوسيئيشن آف جاپان جي اڳواڻن اياز لطيف پليجي جو شاندار استقبال ڪري کيس اجرڪون اوڍايون. اڳواڻن سان ڳالھائيندي اياز لطيف پليجي چيو ته دنيا ۾ پکڙيل جاپان، آمريڪا، برطانيا سميت دنيا ۾ پکڙيل سنڌي ماڻھو سنڌ ۾ ويٺل نوجوانن کي اعلي تعليم ۽ روزگار جا موقعا فراھم ڪرڻ ۾ مدد ڪن. ميرٽ سان مشڪلاتن جو مقابلو ڪري سگھجي ٿو. وفاقي حڪومت سنڌ کان لاتعلق آھي. سنڌ کي ڪرپشن ۽ بدامني جي ڪالوني بنايو ويو آھي. سنڌ حڪومت جي ايجنڊا صرف ڪرپشن جا نوان نوان طريقا ايجاد ڪرڻ آھي. سنڌ جي وسيلن کي تين وال ڪيو پيو وڃي. ميرٽ کي ختم ڪيو ويو آھي. سنڌ ۾ ڊگرين ۽ نوڪرين سميت ھر شئي جو اگھ مقرر آھي. ٻاھر ويٺل سنڌي ماڻھو سنڌ جي تعليم، صحت، روزگار لاءِ ڪردار ادا ڪن. اياز لطيف پليجي چيو ته حڪمرانن جون معاشي پاليسيون پورھيت دشمن آھن. پاڪستان شفافيت، برابري، رواداري، ميرٽ سان ترقي ڪري سگھي ٿو. معاشي پاليسيون عوام دوست بنائڻيون پونديون. اياز لطيف پليجي چيو ته سنڌ جا ماڻھو امن، برابري، انصاف، تعليم ۽ معاشي انصاف چاھين ٿا. 27ھين آئيني ترميم عدالت ۽ جمھوريت تي راتاهو آھي. سنڌ جي ثقافت امن، محبت ۽ رواداري واري آھي. سنڌ وسيلن سان مالا مال آھي پر ڪرپشن جي ڪري پوئتي آھي.