ملير: گلشن حديد ۾ جر لهي ويو، ڪيترائي بورنگ جا کوهه سُڪي ويا

واٽر سپلائي بحال نه ٿي، جر لهڻ سبب عمارتن جي هيٺ دٻجڻ جو خطرو وڌي ويو

ملير (رپورٽ: عبدالرشيد مورجھريو) ڪراچي جي صنعتي ۽ رهائشي علائقي گلشن حديد ۾ زميني پاڻي جي سطح خطرناڪ حد تائين هيٺ لهڻ لڳي آهي، جنهن سبب علائقي ۾ لڳايل ڪيترائي بورنگ جا کوه مڪمل طور سڪي ويا آهن۔ ماهرن خبردار ڪيو آهي ته جيڪڏهن واٽر سپلائي نظام کي فوري طور بحال نه ڪيو ويو، ته علائقي ۾ زمين پوري دٻجي ويندي جنهن سان عمارتن جي بنيادن کي نقصان پهچڻ جو انديشو آهي علائقي واسين موجب گذريل ڪجه مهينن کان پاڻي جي شديد کوٽ آهي۔ جيڪي بورنگ اڳ 100 فوٽ تي پاڻي ڏيندا هئا، هاڻي اتي هڪ ڦڙو به نٿو نڪري۔ گلشن حديد جي مختلف سيڪٽرن، خاص طور تي A، B ۽ C علائقن ۾ درجنين گهر، عمارتون ۽ ڪارخانا پاڻي جي کوٽ سبب متاثر آهن۔ رهواسين جو چوڻ آهي ته ٽينڪر مافيا هن صورتحال مان فائدو وٺي پاڻي جا اگهه ٻيڻا ڪري ڇڏيا آهن، جنهن سان عام ماڻهن تي اضافي بار پئجي رهيو آهي ارضياتي ماهرن چيو آهي ته علائقي مان مسلسل بورنگ ۽ زمين مان ضرورت کان وڌيڪ پاڻي ڪڍڻ سبب زمين جي اندر خال (voids) پيدا ٿي رهيا آهن، جيڪي برقرار رهيا ته عمارتن ۾ دراڙون پئجي سگهن ٿيون يا عمارتون هيٺ ويهي سگهن ٿيون۔ سندن چوڻ آهي ته گلشن حديد ڇاڪاڻ⁠تہ هڪ ري ڪليم ڪيل علائقي (reclaimed land) تي آباد آهي، تنهنڪري اتي جي زمين جي بناوت اڳ ئي ڪمزور آهي مقامي رهواسين واٽر بورڊ ۽ بلدياتي ادارن کان مطالبو ڪيو آهي ته گلشن حديد لاءِ واٽر سپلائي لائينون فوري طور بحال ڪيون وڃن ۽ علائقي ۾ پاڻي جي زخيرن ۽ زميني سطح تي هنگامي بنيادن تي سروي ڪيو وڃي۔ انهن خبردار ڪيو آهي ته جيڪڏهن فوري قدم نه کنيا ويا ته هي مسئلو رڳو پاڻي جي کوٽ تائين محدود نه رهندو پر هڪ ماحولياتي ۽ انساني الميي ۾ تبديل ٿي سگهي ٿو سندن چوڻ آهي ته سنڌ حڪومت ۽ واٽر بورڊ کي گهرجي ته هڪ خصوصي ڪميٽي ٺاهي، گلشن حديد کي "ريڊ الرٽ ايريا" قرار ڏئي، جيئن وڌيڪ نقصان کان بچي سگهجي۔