سنڌي وسندي نور محمد ڳوٺ کي ڊاھڻ لاء ٻئي ڏينهن به چڙھائي، جهڙپون، شيلنگ ۾ ڪيترائي بيهوش

انتظاميه پاران ڪالهه ٻئي ڏينهن به ڳوٺ کي ڊاهڻ لاءِ ڪاهه ڪئي وئي، ڳوٺاڻن پاران عورتن سميت سخت مزاحمت

اوڀرڪراچي(رپورٽ اعجاز چانڊيو) سنڌي وسندي نور محمد ڳوٺ کي ڊاھڻ لاء ٻئي ڏينهن به چڙھائي، جهڙپن کانپوءِ صورتحال ڇڪتاڻ جو شڪار۔ شيلنگ. ڪيترائي ڳوٺاڻان بيھوش، تفصيل موجب. ڪراچي. جمالی پل ڀرسان واقع سنڌي وسندي نور محمد ڳوٺ کي ڊاھڻ لاء لاءِ انتظاميا پاران ڪارروائي جو ٻيو ڏينهن به ڇڪتاڻ سان گذريو. اينٽي انڪروچمينٽ فورس، روينيو ڊپارٽمينٽ، ضلعي انتظاميه، ضلع ايسٽ پوليس، سوئي سدرن گيس، ڪي اليڪٽرڪ ۽ واٽر بورڊ جا اهلڪار عدالتي حڪمن تحت علائقي ۾ آپريشن لاءِ پهتا. انتظامي عملدارن جو چوڻ آهي ته ڪارروائي عدالت جي واضع حڪمن جي روشني ۾ ڪئي پئي وڃي، جنهن ۾ سڀ لاڳاپيل ادارا ۽ ضلعي انتظاميه شامل آهن، جڏهن ته ضلع ايسٽ پوليس امن امان برقرار رکڻ لاءِ آپريشن ۾ حصو وٺي رهي آهي.ٻئي پاسي عيني شاهدن ۽ مقامي رهواسين موجب آپريشن دوران مظاهرين کي منتشر ڪرڻ لاءِ آنسو گيس جي شيلنگ ڪئي وئي، جنهن سبب مردن، عورتن ۽ ٻارن کي ساهه کڻڻ ۾ تڪليف پيش آئي. صورتحال ڇڪتاڻ جو شڪار ٿيڻ بعد ڪجهه مظاهرين پاران پٿراءُ پڻ ڪيو ويو، جنهن ڪري علائقو ميدانِ جنگ جو منظر پيش ڪرڻ لڳو. ڇڪتاڻ وڌڻ تي اختيارين عارضي طور علائقو خالي ڪري ڇڏيو. ان کان پوءِ نور محمد ڳوٺ جي رهواسين هڪ مبينا بلڊر خلاف احتجاجي ريلي ڪڍي، جيڪا ٿاڻي سائيٽ سپر هاءِ وي تائين پهتي، جتي مظاهرين ٿاڻي جي مين گيٽ اڳيان احتجاج ڪيو. مظاهرين چيو ته سندن ڳوٺ ڪيترن سالن کان آباد آهي ۽ سندن وٽ مالڪي يا رهائشي دستاويز موجود آهن. هنن الزام لڳايو ته هڪ نجي بلڊر سندن زمين تي دعويٰ ڪري کين بي دخل ڪرائڻ جي ڪوشش ڪري رهيو آهي. رهواسين موجب جڏهن کان علائقي کي شهري حدن ۾ شامل ڪيو ويو آهي، تڏهن کان بي دخلي جا خطرا وڌي ويا آهن. ڳوٺاڻن مطالبو ڪيو ته سندن دستاويزن جي جاچ ڪري کين قانوني تحفظ ڏنو وڃي ۽ ڪنهن به ڪارروائي کان اڳ قانوني گهرجون پوريون ڪيون وڃن. مظاهرين جي الزامن بابت لاڳاپيل بلڊر يا ٻين اختيارين طرفان اڃا تائين ڪو باضابطه موقف سامهون نه آيو آهي.