مورو جي ڳوٺ بهاول زرداري واسي پورهيت جو ڀاءُ ۽ روينيو عملدار خلاف احتجاج

نوشھرو فيروز(ڊ ر)موري جي ڀرپاسي ڳوٺ بهاول زرداري جي رهواسي غلام فريد زرداري پاران پنهنجي ڀاءُ ۽ روينيو عملدارن خلاف پريس ڪلب اڳيان احتجاجي مظاهرو ڪيو ويو۔ تفصيل موجب ديھ ويسر جي زميندار غلام فريد ولد پير بخش زرداري پنهنجي ڀاءُ عرس زرداري خلاف احتجاج ڪندي ميڊيا کي ٻڌايو ته سندن والد پير بخش زرداري پنج ايڪڙ زرعي زمين ٽن ڀائرن غلام فريد، محمد وارث ۽ اقبال زرداري جي نالي ڪئي هئي، جنهن جي رجسٽري به والد جي حياتي ۾ ئي سندن نالن تي ٿي وئي هئي۔ هن الزام هڻندي چيو ته والد جي وفات بعد سندن ڀاءُ عرس زرداري روينيو عملدارن سان ملي سندن زمين جا جعلي ڪاغذ تيار ڪرائڻ جي ناڪام ڪوشش ڪري رهيو آهي ۽ کين جان کان مارڻ، ڪوڙن ڪيسن ۾ ڦاسائڻ ۽ زمين تي قبضي جون ڌمڪيون ڏئي رهيو آهي۔ غلام فريد زرداري وزيراعليٰ سنڌ ۽ ٻين اعليٰ اختيارين کان مطالبو ڪيو ته ساڻن فوري انصاف ڪيو وڃي، ٻي صورت ۾ هو پنهنجي ٻارن سميت ڊي سي آفيس اڳيان ڌرڻو هڻندا۔