جرڳا ڪري معصوم نياڻين جا خون لوڙھيا وڃن ٿا: اياز لطيف پليجو

جاگيرداري سماج عورتن لاءِ مقتل گاھ آھي، بلوچستان جھڙا المناڪ سانحا سنڌ ۾ بہ ٿين ٿا

حيدرآباد(بيورو)قومي عوامي تحريڪ جي سربراھ اياز لطيف پليجي چيو آهي تہ جاگيرداري سماج عورتن لاءِ مقتل گاھ آھي. ھاري، مزدور، پورھيت، ٻار تعليم، صحت سميت بنيادي انساني حقن کان محروم آھن. بلوچستان جھڙا المناڪ سانحا سنڌ ۾ بہ ٿين ٿا، جرڳا ڪري معصوم نياڻين جا خون لوڙھيا وڃن ٿا. اياز لطيف پليجي چيو تہ پيپلز پارٽي حڪومت خوني جاگيرداري جرڳائي نظام کي وڌيڪ مظبوط ڪيو آھي. سپريم ڪورٽ جرڳن تي پابندي ھنئي ان باوجود حڪومتي وزير ۽ ٻيا نمائندا رياست اندر رياست قائم ڪري پنھنجي عدالت لڳائي دھشتگردن، خونين، ڌاڙيلن ۽ ڏوھارين کي معاف ڪن ٿا ۽ خون لوڙھي ڇڏين ٿا. اياز لطيف پليجي چيو تہ اتر سنڌ جون 2 ڊويزنون سکر ۽ لاڙڪاڻو ڌاڙيلن جي حوالي آھن، باقي سنڌ بہ ڏوھارين ۽ منشيات فروشن جي رحم ۽ ڪرم تي آھي. نياڻيون اغوا ڪري زبردستي انھن جا مذھب تبديل ڪري شاديون ڪرايون وڃن ٿيون. احتجاجن ۽ ھاء پروفائيل ڪيس ٿيڻ باوجود نياڻين سان انصاف نٿو ٿئي. جيڪي نياڻيون ڪارنھن الزام ھڻي قتل ڪيون وڃن ٿيون، انھن جي قاتلن کي انجام تي پھچائڻ بدران تحفظ ڏنو وڃي ٿو. اياز لطيف پليجي چيو تہ سنڌ ۾ انساني حقن جون بدترين ڀڃڪڙيون ٿي رھيون آھن پر ڪٿي بہ قانون ۽ انصاف ناھي.