سنڌ دشمن منصوبن خلاف ڪڏھن به خاموش نه ويهنداسين: اياز لطيف پليجو

پيپلزپارٽي چاھي ٿي اسان کي حڪومت ڏيندا رهو عيوضي ۾ سنڌ جو پاڻي، زمينون ۽ وسيلا کڻي وڃو

حيدرآباد(بيورو) اياز لطيف پليجي چيو تہ نوڪريون ۽ ڊگريون وڪامن ٿيون. ميرٽ جي لتاڙ منافعي بخش ڪاروبار بنجي ويو آھي. سنڌ دشمن منصوبن خلاف ڪڏھن بہ خاموش نہ ويهنداسين. انصاف لاءِ ۽ سنڌ جي وسيلن جي تحفظ لاءِ جدوجهد جاري رهندي، ڪئنالن سان گڏ ڪارپوريٽ فارمنگ منصوبن کي بہ ختم ڪرڻ تائين جدوجهد ڪبي. اياز لطيف پليجي چيو تہ پيپلزپارٽي چاھي ٿي اسان کي حڪومت ڏيندا رهو عيوضي ۾ سنڌ جو پاڻي، زمينون ۽ وسيلا کڻي وڃو. تنهن ڪري سنڌ جي ماڻهن کي سمجھڻ کپي تہ سنڌ جي پاڻي تي ڌاڙو، زمينن قبضن ، ميرٽ لتاڙ ۾ پيپلزپارٽي ۽ سنڌ حڪومت ملوث آهي زرداري مافيا ۽ پيپلز پارٽي امير سنڌ کي ڪرپشن ،بک، بدحالي ۽ بيروزگاري کانسواءِ ڪجھ ناھي ڏنو. ڪرپشن سنڌ ۽ ملڪي معيشت جو ٻيڙو غرق ڪري ڇڏيو. اياز لطيف پليجي چيو تہ سنڌ ۾ پٽيوالي جي نوڪري کان وٺي اعلي پوسٽون ڪروڙين روپين ۾ وڪرو ٿين ٿيون. جيڪي ڪامورا پئسا ڏئي مقرر ٿين ٿا، آھي عوام جي دولت تي اچي ڌاڙا ھڻن ٿا. ڪنھن بہ آفيس ۾ عوام جو ميرٽ تحت ڪم نٿو ٿئي. ترقياتي ڪمن جا ٺيڪا وڪامن ٿا ۽ پوءِ ناقص ڪم ڪري اربين روپين جي ڪرپشن ڪئي وڃي ٿو، اھڙي صورتحال ۾ سنڌ ڪيئن ترقي ڪري سگھي ٿي اڳواڻن چيو تہ سنڌي عوام جي حقن تي ڌاڙا ھنيا وڃن ٿا. ميرٽ، قانون، آئين جون ڌڄيون اڏايون وڃن ٿيون. سنڌ حڪومت سنڌ کي ڪرپشن جي ڪالوني بنائي ڇڏيو آھي. پيپلز پارٽي کي سنڌ لٽڻ لاءِ چوٿون ڀيرو اقتدار ڏنو ويو آهي آھي ۽ ان جي بدلي ۾ سنڌو درياءَ ڪارپوريٽ فارمنگ جي نالي ۾ سنڌ جي لکين ايڪڙن تي زمينن تي قبضا ۽ وسيلن تي وفاق ڌاڙا ھڻي رھيو آھي.