ملير ۾ شهيد مير مرتضيٰ ڀٽو جي قاتلن جي گرفتاري لاءِ احتجاج

مير مرتضيٰ ڀٽو ۽ سندس ساٿين جي قتل کي 29 سال گذري ويا پر سندن خون سان انصاف نه ٿيو: اڳواڻ

ملير (ڊ ر) پاڪستان پيپلزپارٽي شهيد ڀٽو ملير پاران شهيد مير مرتضيٰ ڀٽو جي قاتلن جي گرفتاري لاءِ ڊسٽرڪٽ پريس ڪلب ملير جي آڏو احتجاجي مظاهرو ڪري نعريبازي پڻ ڪئي وئي، ان موقعي تي محمد عرس خشڪ ،سلمان جمالي ، ثاقب چانڊيو معظم خشڪ، جاني خشڪ ۽ ٻين مظاهري کي خطاب ڪندي چيو ته شهيد مير مرتضيٰ ڀٽو جي قتل کي 29 سال گذري ويا آهن پر اڄ تائين شهيد مير مرتضيٰ ڀٽو ۽ سندس ساٿين کي قتل ڪندڙ ۽ سازش ۾ ملوث ڪردارن کي ڪيفر ڪردار تائين ناهي پڄايو ويو، 29 سال گذرڻ باوجود به عدالت ۾ ڪيس هلندڙ آهي جڏهن ته شهيد جا وارث اڄ به عدالتن جا چڪر ڪاٽي رهيا آهن، هنن مطالبو ڪندي چيو ته شهيد مير مرتضيٰ ڀٽو جو قتل ڪيس ترجيحي بنيادن تي هلائي ملوث ڪردارن ۽ قاتلن کي ڪيفر ڪردار تائين پڄائي شهيدن جي خون سان انصاف ڪيو وڃي، اڳواڻن وڌيڪ چيو ته پيپلزپارٽي ڪرپٽ ماڻهن تي ٻڌل هڪ ٽولو آهي جيڪو سنڌ ۽ ملڪ کي ٻنهي هٿن سان لٽي رهيو آهي، هنن چيو ته هڪ طرف مهانگائي آسمان سان ڳالهيون ڪري رهي آهي ته ٻئي طرف غريب مسڪين ماڻهن کان مهانگائي ذريعي ماني ڳڀو به کسيو پيو وڃي، اقتدار ۾ ويٺل حڪمران عياشيون ڪري رهيا آهن ۽ غريب مسڪين ماڻهون بکون ڪاٽي رهيا آهن، هنن چيو ته شهيد مير مرتضيٰ ڀٽو جي فرزند جونيئر ذوالفقار علي ڀٽو ميدان تي اچي ويو آهي ۽ سنڌ جا ماڻهون ۽ ملڪ جو عوام شهيد مير مرتضيٰ ڀٽو وانگر ساڻس محبت ۽ پيار ڪري ٿو انشاءَالله سندس قيادت ۾ سنڌ جي سمورن ٻرندڙ مسئلن تي آواز اٿاربو جونيئر ذوالفقار علي ڀٽو جي ميدان تي اچڻ سان پيپلزپارٽي جي قيادت جون ننڊون حرام ٿي ويون ٿيون آهن.