عمرڪوٽ ۾ سنڌ ايمپلائيز الائنس جو ڏھين ڏينھن به احتجاج جاري، اسڪول، آفيسون ۽ اسپتالون بند، ڊاڪٽرن ۽ اسٽاف پاران به بائيڪاٽ

جيستائين جائز مطالبا تسليم نٿا ڪيا وڃن تيستائين تحريڪ جاري رهندي: اڳواڻ

عمرڪوٽ (رپورٽ:ڪانجي مل رکيسر) سنڌ ايمپلائيز يونين ۽ آل سنڌ ايمپلائيز الائنس جي سڏ تي عمرڪوٽ ۾ سرڪاري ملازمن جو احتجاج ڏھين ڏينھن به جاري رهيو، جنهن دوران موتي چوڪ کان پريس ڪلب تائين وڏي ريلي ڪڍي وئي، ريلي ۾ وڏي تعداد ۾ فيميل ٽيچرس ريحانه کوسو، پپي، ڪوشيلا، نصرت ۽ ميل ٽيچرس خان محمد کوسو، حاجي رفيق ڪنڀر، خير محمد مهر، جيٺانند بجير، گوتم سميت سوين استادن، آفيسرن، ڊاڪٽرن ۽ ٻين ملازمن شرڪت ڪئي، احتجاج ڪندڙن هٿن ۾ بينرز ۽ پلي ڪارڊ کڻي نعريبازي ڪئي ۽ حڪومت خلاف سخت تڪڙا نعرا هنيا، پريس ڪلب آڏو ڌرڻو پڻ هنيو ويو، جتي اڳواڻن چيو ته جيستائين حڪومت اسان جا جائز مطالبا منظور نٿي ڪري، احتجاج جاري رهندو، ھنن چيو تہ پينشن مان ڪيل غيرقانوني ڪٽوتيون ختم ڪري پينشن جو مڪمل نظام بحال ڪيو وڃي، گروپ انشورنس ۽ بينيوولنٽ فنڊز جون رڪاوٽون ختم ڪري رٽائرمينٽ تي رقم فوري ادا ڪئي وڃي، ڊسپرٽي الانس (DA) بحال ڪيو وڃي ۽ ٻين کاتن جي ملازمن وانگر برابريءَ جي مراعتون ڏنيون وڃن، سنڌ جي استادن، ڊاڪٽرن ۽ سرڪاري عملي لاءِ مستقل اسٽرڪچر ۽ تحفظ فراهم ڪيو وڃي نتہ جلد تاريخي ڌرڻو ھنيو ويندو، جڏھن تہ احتجاج دوران ڪيترائي اسڪول بند رهيا، شاگردن جي پڙهائي متاثر ٿي، سرڪاري آفيسن ۾ ڪم بند رهيو، عام ماڻهون پنهنجي ڪم ڪار لاءِ پريشان رهيا، اسپتالن ۾ ڊاڪٽرن ۽ پيرا ميڊيڪل اسٽاف پڻ بائيڪاٽ ڪيو، جنهن سبب مريضن کي علاج ۾ سخت مشڪلاتون پيش آيون، يونين اڳواڻن جو چوڻ هو ته جيڪڏهن حڪومت فوري طور تي انهن جا مطالبا نه ٿي مڃي ته احتجاج جو دائرو وڌايو ويندو، شهر شهر ڌرڻا ۽ روڊ بلاڪ ڪيا ويندا، ۽ ممڪن آهي ته پوري سنڌ ۾ هڙتال جو اعلان ڪري تاريخي ڌرڻو ھنيو ويندو، ٻي طرف احتجاج سبب شهري سخت پريشاني جو شڪار ٿي ويا، والدين چيو ته اسڪول بند ٿيڻ سبب سندن ٻار تعليم کان پري ٿي رهيا آهن، جڏهن ته مريضن جي وارثن چيو ته اسپتالن ۾ ڊاڪٽر ۽ اسٽاف جي بائيڪاٽ سبب علاج معالج ۾ ڏکيائي ٿي رهي آهي، سرڪاري آفيسن ۾ ڪمن ڪارن لاءِ سخت مشڪلاتن کي منهن ڏيڻو پيو پئي.