بااثرن وقار ميمڻ ۽ صوفي ذوالفقار قادري جي چرچ تي گھر تي قبضو ڪيو آهي: ماروي زئور

ٺٽي ۾ گهر تي مبينا قبضي خلاف ناري جو امڙ سميت احتجاج

ٺٽو( محمد شفيق ڀٽي) مڪلي سرڪٽ ھائوس ڀرسان ڪچي آبادي جي رھواسڻ ماروي ڌيءُ علي اصغر زئور پنھنجي پيرسن ماءُ سان گڏ عوامي پريس ڪلب ٺٽو ۾ پريس ڪانفرنس ڪندي الزام ھنيو آھي تہ مقامي بااثرن پاران سندس گھر تي مبينا قبضو ڪري کين بيدخل ڪيو ويو آھي ھن گھر ۾ گھڙي ڀڃ ڊاھ ڪرڻ توڙي کين بي دخل ڪرڻ واري عمل خلاف دانھيندي چيو تہ اسان 1999ع ۾ مڪلي تي سرڪٽ ھائوس ڀرسان ھڪ پلاٽ خريد ڪيو ھو، جنھن ۾ اڏاوت ڪرڻ بعد 2008ع کان رھائش پذير آھيون، سندن گھر سامھون صوفي ذوالفقار قادري جو آستانو موجود آھي، جن جا فقير کين ھر وقت تنگ ڪندا رھن ٿا. ھن الزام ھڻندي چيو تہ حاجي مختيار پليجو، ارشاد پليجو، ذوالقرنين پليجو، غفور پليجو جن پاران وقار ميمڻ ۽ صوفي ذوالفقار قادري جي چرچ تي اسان جي گھر ۾ داخل ٿي قبضو ڪري ويھي رھيا آھن، جيڪي اسان کي پنھنجي گھر ۾ وڃڻ نٿا ڏين. ھن چيو تہ اسان نہ پنھنجو گھر وڪرو ڪيو آھي ۽ نہ ئي ڪو گھر جو سودو ڪيو آھي، اسان سان وڏي ناانصافي ڪري گھر تي قبضو ڪري گھر ۾ رکيل قيمتي سامان کي بہ نقصان پھچايو ويو آھي. ھن ڊي سي ٺٽو، ايس ايس پي ٺٽو، چونڊيل نمائندن سميت سمورن وس وارن کان گھر ڪئي تہ ساڻن انصاف ڪري سندن گھر تي ٿيل قبضو خالي ڪرائي گھر سندن حوالي ڪري قبضو ڪندڙن خلاف ڪاروائي ڪري ٿيل نقصان جو ازالو ڪرايو وڃي، ٻئي صورت ۾ سخت احتجاج ڪرڻ سان گڏ انصاف لاء عدالت ۾ وينداسين.