ڪمشنر ڪراچي پاران پاڪستان اسٽيل ملز بابت معاهدن تي عملدرآمد جو جائزو وٺڻ اجلاس طلب

9آڪٽوبر تي ڪمشنر ڪراچي جي صدارت هيٺ سندس آفيس جي ڪميٽي روم ۾ اجلاس ٿيندو

ملير (رپورٽ: عبدالرشيد مورجھريو) ڪميشنر ڪراچي ڊويزن پاران پاڪستان اسٽيل ملز سان لاڳاپيل پاڻي جي فراهمي، تعليمي ادارن ۽ صحت جي سهولتن بابت مفاهمتي يادداشتن (MoUs) تي عملدرآمد جو جائزو وٺڻ لاءِ هڪ اهم فالو اَپ اجلاس 9 آڪٽوبر تي طلب ڪيو ويو آهي۔ سرڪاري اطلاع موجب اجلاس ڪميشنر ڪراچي جي آفيس جي ڪميٽي روم ۾ ٿيندو، جنهن جي صدارت ڪميشنر ڪراچي پاڻ ڪندا۔ اجلاس جي اطلاعن مطابق هي نوٽيس اسسٽنٽ ڪميشنر ريوينيو سجاد احمد ابڙو طرفان جاري ڪيو ويو آهي اجلاس ۾ هي اهم عملدار ۽ لاڳاپيل ڌريون شرڪت ڪنديون پاڪستان اسٽيل ملز جا چيئرمين ۽ ڪارپوريٽ سيڪريٽري،ڊپٽي ڪميشنر ملير،ڪراچي واٽر اينڊ سيوريج ڪارپوريشن جو سي اي او، ضلعي صحت آفيسر ۽ ضلعي تعليم آفيسر مليرڊائريڪٽر ٽيڪنيڪل ايجوڪيشن ڪراچي، ۽ مسٽر شمشاد قريشي، ڪنوينر گرينڊ الائنس آف ايمپلائز آف پاڪستان اسٽيل ملز اجلاس جو ايجنڊو 9 اپريل 2025ع تي ٿيل گذريل اجلاس ۾ طئي ڪيل فيصلن جي عملداري ۽ اڳڀرائي جو جائزو وٺڻ تي ٻڌل هوندو، جنهن ۾ پاڪستان اسٽيل ملز جي ملازمن ۽ ويجهن علائقن جي رهواسين لاءِ بنيادي شهري ۽ فلاحياتي سهولتن ۾ سڌارن تي غور ڪيو ويو هو ڪميشنر ڪراچي طرفان سڀني لاڳاپيل اختيارين کي هدايت ڪئي وئي آهي ته اهي اجلاس ۾ پنهنجي حاضري ۽ مڪمل سهڪار کي يقيني بڻائن، جيئن پاڪستان اسٽيل ملز سان لاڳاپيل پاڻي، تعليم ۽ صحت جي سهولتن جي بهتري لاءِ ايندڙ قدمن جو تعين ٿي سگهي۔