سینئر وزیر سندھ شرجیل انعام میمن کے مطابق خواتین کو بااختیار بنانے کے لیے صوبے کے مختلف شہروں میں اسکوٹی ٹریننگ پروگرام شروع کیا جا رہا ہے۔
کراچی میں صوبائی وزیرِ ٹرانسپورٹ شرجیل انعام میمن کی صدارت میں محکمۂ ٹرانسپورٹ و ماس ٹرانزٹ کا اہم اجلاس منعقد ہوا، جس میں جاری اور مستقبل کے منصوبوں پر تفصیلی غور کیا گیا۔
ترجمان کے مطابق اجلاس میں حیدرآباد، سکھر اور لاڑکانہ میں خواتین و طالبات کے لیے اسکوٹی ٹریننگ پروگرام شروع کرنے کا فیصلہ کیا گیا، تاکہ خواتین کو بااختیار بنایا جا سکے اور اُن کے لیے آمد و رفت آسان ہو۔ اس کے ساتھ ساتھ سندھ کے مزید تین اضلاع میں پیپلز بس سروس کے دائرہ کار کو بڑھانے کا بھی فیصلہ کیا گیا۔
اجلاس میں یلو لائن بی آر ٹی کے اہم حصے تاج حیدر پل کو عوام کے لیے کھولنے کی منظوری بھی دی گئی۔
سینئر وزیر شرجیل انعام میمن نے اجلاس سے خطاب میں کہا کہ خواتین کے لیے اسکوٹی چلانے کی تربیت نجی کمپنی کے اشتراک سے دی جائے گی، جبکہ ٹریننگ مکمل کرنے والی خواتین کو مفت ڈرائیونگ لائسنس جاری کیے جائیں گے۔ یہ اقدام خواتین کی خود مختاری اور روزگار کے نئے مواقع پیدا کرنے کی سمت ایک مثبت قدم ہے۔
انہوں نے مزید بتایا کہ گلشنِ معمار سے ٹاور تک 15 برقی (ای وی) بسوں پر مشتمل نیا روٹ شروع کیا جا رہا ہے، جو شہریوں کو جدید اور ماحول دوست سفری سہولت فراہم کرے گا۔
شرجیل میمن نے انکشاف کیا کہ خیرپور، شکارپور اور نوشہرو فیروز میں 20 نئی بسیں بھی چلائی جائیں گی، تاکہ سندھ کے دیگر شہروں میں بھی معیاری ٹرانسپورٹ کی سہولیات دستیاب ہوں۔
انہوں نے مزید کہا کہ دسمبر میں ای وی ٹیکسی سروس کا آغاز کیا جائے گا، جس کے ابتدائی مرحلے میں 30 پنک ای وی ٹیکسیوں کے لیے خواتین ڈرائیورز کو تربیت دی جائے گی۔
ترجمان کے مطابق، صوبائی حکومت کے یہ اقدامات سندھ بھر میں خواتین کی نقل و حرکت، روزگار اور ماحول دوست ٹرانسپورٹ کے فروغ کے لیے سنگِ میل ثابت ہوں گے۔
0 تبصرے