سنڌي مزدور تحريڪ ڪراچي ڊويزن طرفان شير پائو ملير ۾ مچ ڪچهري منعقد

مچ ڪچهري ۾ سياسي، سماجي ۽ مزدور تنظيمن جي اڳواڻن سميت وڏي تعداد ۾ ماڻهن شرڪت ڪئي

ملير (رپورٽ: عبدالرشيد مورجھريو) سنڌي مزدور تحريڪ ڪراچي ڊويزن طرفان شير پائو ملير ۾ رنگا رنگ مچ ڪچهري جو شاندار پروگرام ڪيو ويو، جنهن ۾ سياسي، سماجي ۽ مزدور تنظيمن جي اڳواڻن سميت وڏي تعداد ۾ ماڻهن شرڪت ڪئي، تقريب جي اڳواڻي عبدالجبار پليجو، محمد علي ساھڙ، عنايت آرباڻي، طارق چانڊيو ۽ ٻين عهديدارن ڪئي، جڏهن ته عوامي تحريڪ جي مرڪزي اڳواڻ اقبال جروار، ڪراچي ڊويزن جي صدر عبدالله ٻپڙ، حامد مير عباسي، اياز ڪنگو، عزیز لانگا، خورشید قريشي، يوسف نوحاڻي، نويد سنڌي سميت ڪيترن ئي ساٿين پڻ شرڪت ڪئي.مچ ڪچهري دوران مقررین سنڌ جي ثقافت، مزدور طبقي جي مسئلن ۽ جديد دور ۾ مزدور جدوجهد جي اهميت تي تفصيلي خطاب ڪيا. اڳواڻن چيو ته سنڌي مزدور تحريڪ جو مقصد مزدورن جي حقن لاءِ گڏيل آواز اٿارڻ، استحصال جي خاتمي ۽ مزدورن لاءِ باعزت روزگار جا موقعا پيدا ڪرائڻ آهي.تقريب ۾ شرڪت ڪندڙن چيو ته مچ ڪچهري جهڙيون ثقافتي تقريبون نه رڳو سنڌي روايتن کي زنده رکن ٿيون، پر گڏيل جدوجهد لاءِ ماڻهن کي هڪ پليٽفارم تي گڏ به ڪن ٿيون. اڳواڻن مطالبو ڪيو ته حڪومت مزدورن جي اجرتن ۾ اضافو ڪري، سماجي تحفظ جا قانون مؤثر بڻائي ۽ مزدورن لاءِ سهولتون مهيا ڪري.