گلشنِ حديد جا عوامي مسئلا سنگين صورتحال اختيار ڪري ويا, سول سوسائٽي تي ٻڌل سيٽيزن فورم پاران سخت ڳڻتيءَ جو اظهار

صفائي سٿرائي ۽ بنيادي سهولتن جي فراهمي لاءِ فوري قدم کنيا وڃن: مطالبو

ملير (رپورٽ: عبدالرشيد مورجھريو) گلشنِ حدید فیز 1، 2 ۽ 3 جا رهواسي پاڻي، سيوريج، رستن، گيس، ٽرانسپورٽ ۽ امن و امان سميت ڪيترن ئي بنيادي مسئلن کي ور چڙهي ويا آهن. سول سوسائٽي تي ٻڌل سيٽيزن فورم علائقي جي صورتحال تي سخت ڳڻتيءَ جو اظهار ڪندي لاڳاپيل ادارن کان فوري ۽ عملي قدم کڻڻ جو مطالبو ڪيو آهي.سيٽيزن فورم موجب گلشنِ حدید ۾ پاڻي جي شديد کوٽ آهي،جنهن سبب رهواسي مهانگا ٽينڪر خريد ڪرڻ تي مجبور آهن. فورم مطالبو ڪيو آهي ته پاڻي جي فراهمي بابت هلندڙ منصوبن جي پيش رفت عوام آڏو آندي وڃي ۽ رڪاوٽون وجهندڙ عنصرن جي نشاندهي ڪري ڪارروائي ڪئي وڃي.فورم جو چوڻ آهي ته فیز 1 جي اندروني علائقن ۾ برساتی نالن جي ٽوڙ ڦوڙ سبب معمولي برسات ۾ به گهٽيون ۽ گهر پاڻي هيٺ اچي وڃن ٿا. فورم نالن جي فوري بحالي، سيوريج نظام جي بهتري ۽ ٻنهي يوسيز ۾ ڪنڊي مين مقرر ڪرڻ جو مطالبو ڪيو آهي.خبر موجب غير منظم رڪشا ٽرانسپورٽ ۽ ناجائز حد خلين سبب علائقي ۾ ٽريفڪ مڪمل طور مفلوج ٿي چڪي آهي. سيٽيزن فورم حد دخلين جي خاتمي ۽ رڪشا ٽرانسپورٽ کي ضابطي ۾ آڻڻ تي زور ڏنو آهي.امن و امان جي حوالي سان فورم مطالبو ڪيو آهي ته ڀرپاسي موجود غير قانوني جهڳيون ختم ڪيون وڃن، غير قانوني رستا بند ڪيا وڃن ۽ پوليس گشت ۾ اضافو ڪيو وڃي ته جيئن ڏوهن تي ضابطو آڻي سگهجي.ان کان علاوه فورم پاران سنڌو چوڪ کان سي-116 فیز 1 تائين نئون روڊ جي تعمير ڪئي وڃي خراب رستن تي فوري پيچ ورڪ، برسات دوران گهرن ۾ پاڻي داخل ٿيڻ جي مستقل حل، سوئي گيس جي گهٽ پريشر ۽ بندش جي خاتمي، هل ٽاپ پارڪ جي تڪميل ۽ گهٽين ۾ لائوڊ اسپيڪرن جي استعمال تي پابندي جو مطالبو پڻ ڪيو ويو آهي.سيٽيزن فورم گلشنِ حدید جي مسئلن جي مستقل حل لاءِ سڀني اسٽيڪ هولڊرز تي ٻڌل گڏيل ڪميٽي قائم ڪرڻ جو پڻ مطالبو ڪيو آهي.