گڏيل حڪومت کي عوام جو ڪو احساس ناھي. سنڌ کي نيلام گھر بڻايو ويو آھي: اياز لطيف پليجو

قومي عوامي تحريڪ جي سربراھ اياز لطيف پليجي چيو آھي تہ گڏيل حڪومت کي عوام جو ڪو احساس ناھي. سنڌ کي نيلام گھر بنايو ويو آھي. پيپلز پارٽي وسيلا وڪڻي حڪومت خريد ڪئي آھي. ھاري، مزدور، پورھيت ھڪ وقت جي ماني لاءِ پريشان آھن. اياز لطيف پليجي چيو تہ جنگ کي بھانو بنائي حڪمران عوام جي معاشي ڦرلٽ ڪري رھيا آھن. بزنس ٽائيڪون کان ٽيڪس نٿو وصول ڪيو وڃي. وزيرن جون شاھ خرچيون بند نٿيون ڪيون وڃي. حڪمران ۽ بيوروڪريٽ مفت جو تيل استعمال ڪن ٿا. باقي عوام لاءِ تيل مھانگو، بجلي مھانگي، گئس مھانگو، تعليم مھانگي، صحت مھانگي، انصاف ناممڪن بنايو ويو آھي. اياز لطيف پليجي چيو تہ پاڪستان ۾ حڪومتون تبديل ٿين ٿيون پر نظام تبديل نٿو ٿئي. ھڪڙا ڦرلٽ وارا وڃن ٿا تہ نوان چھرا سامھون اچن ٿا، جيڪي عوام کي ترقي ۽ خوشحالي جو منصوبو ڏيڻ بدران مھانگائي، بيروزگاري ۽ بدامني جو ڳاٽ ڳچي ۾ وجھن ٿا. اياز لطيف پليجي چيو تہ ڪارپوريٽ فارمنگ سنڌ جي زمينن تي قبضي جي سازش آھي. گرين پاڪستان جي نالي ۾ سنڌ کي بنجر بنايو ويندو. سنڌو درياھ تي ڪو بہ ڪئنال يا ڊيم منصوبو قبول نہ ڪيو ويندو. اياز لطيف پليجي چيو تہ ڊيزل مھانگو ٿيڻ ڪري آبادگار پوکي نہ ڪري سگھندا. ساريون ۽ ٻيا فصل نہ ٿي سگھندا. افغان بارڊر بند ٿيڻ سان آبادگارن کي وڏو نقصان ٿي رھيو آھي. سنڌ جي فصلن جا ھٿرادو اگھ ڪيرائي بيروزگاري ۽ غربت مسلط ڪئي وڃي ٿي. اياز لطيف پليجي چيو تہ فوري طور تي ڊيزل جي قيمت گھٽائي آبادگارن کي سبسڊي ڏني وڃي. سنڌ جو آبادگار مسلسل بحران جو شڪار آھي. حڪومت آبادگارن کي مفت ٻج، ڀاڻ ۽ دوائون فراھم ڪري ته جيئن ٿيل نقصان جو ازالو ٿي سگھي. اياز لطيف پليجي چيو تہ ميرٽ جو قتل ڪيو پيو وڃي. نوڪريون وڪرو ڪيون پيون وڃن. سنڌ ۾ ڪا نئين صنعت نٿي لڳائي وڃي.