خيرپور ڀرسان پوليس جي مبينا ڊرون حملي ۾ 2 نوجوان مارجي ويا، سندن وارثن جو لاش رکي ڌرڻو، صدمي ۾ پيرسن عورت به فوت

ڳوٺ سعيد خان لاکو ۾ پوليس جي مبينا ڊرون حملي ۾ ضامن علي ۽ صدر الدين ڌاريجو مارجي ويا، عورت زخمي ٿي پئي

خيرپور (ڊ ر) خيرپور ڀرسان ڳوٺ سعيد خان لاکو ۾ مبينا پوليس ڊرون حملي دوران مارجي ويل ٻن ڄڻن ضامن علي ۽ صدر الدين ڌاريجو جا لاش وارثن پاران ايس ايس پي آفيس خيرپور آڏو رکي سخت احتجاجي مظاهرو ڪيو ويو، جتي سوين ڳوٺاڻن ۽ عورتن جي شرڪت ڪري ڌرڻو هنيو ۽ پوليس خلاف نعريبازي ڪئي. پوليس سان چڪريون ،پولیس موبائيل ڀڄائي وئي مظاهرين جو چوڻ هو ته شاهه لطيف ٿاڻي جي خيرپور پوليس ۽ ڪنڌرا پوليس بنا ڪنهن جواز جي ڊرون حملو ڪري ٻن بيگناهن کي قتل ڪيو آهي، جنهن سبب علائقي ۾ خوف ۽ هراس پکڙجي ويو آهي. هنن مطالبو ڪيو ته واقعي جي اعليٰ سطحي جاچ ڪرائي ذميوارن خلاف فوري ڪارروائي ڪئي وڃي ۽ متاثر خاندانن کي انصاف فراهم ڪيو وڃي. وارثن الزام لڳايو ته مقتولن جو ڪنهن به غيرقانوني سرگرمي سان ڪو تعلق نه هو، ۽ کين نشانو بڻائڻ سراسر زيادتي آهي. هنن چتاءُ ڏنو ته جيڪڏهن کين انصاف نه مليو ته احتجاج جو دائرو وڌايو ويندو. هوڏانهن پوليس طرفان واقعي بابت تاحال ڪو واضح بيان سامهون نه اچي سگهيو آهي.