عوامي پريس ڪلب ملير طرفان ڪتابن جو عالمي ڏهاڙو ملهايو ويو

تقريب ۾ علم، ادب ۽ ثقافت سان لاڳاپيل شخصيتن وڏي انگ ۾ شرڪت ڪئي

ملير (رپورٽ: عبدالرشيد مورجھريو) عوامي پريس ڪلب ملير طرفان ڪتابن جو عالمي ڏهاڙو وڏي جوش ۽ جذبي سان ملهايو ويو، جنهن ۾ علم، ادب ۽ ثقافت سان لاڳاپيل شخصيتن وڏي انگ ۾ شرڪت ڪئي۔ تقريب ۾ نالي واري ليکڪ محمد علي پٺاڻ جي ڪتاب "شاهه ۽ سٽ ڪهاڻيون" جي مهورتي تقريب پڻ منعقد ڪئي وئي، جڏهن ته عالمي ادب جي عظيم ليکڪ شيڪسپيئر جو جنم ڏهاڙو به ڀرپور نموني سان ملهايو ويو۔تقريب ۾ محمد علي پٺاڻ، سيد خدا ڏنو شاه، پره سومرو، پروفيسر علي شير گهانگهرو، پروفيسر منصور علي، پروفيسر نعيم احمد شيخ، رياض شاهد دايو، سميت سنڌ جي اديبن، ليکڪن، دانشورن ۽ صحافين وڏي تعداد ۾ شرڪت ڪئي۔ مهمانن گڏجي ڪتاب "شاهه ۽ سٽ ڪهاڻيون" جي مهورت ڪئي، جڏهن ته وليم شيڪسپيئر جي جنم ڏهاڙي جي خوشي ۾ ڪيڪ پڻ ڪاٽيو ويو۔ انتظاميا طرفان مهمانن کي اجرڪن جا تحفا پيش ڪيا ويا۔ تقريب کي خطاب ڪندي نامياري ليکڪ محمد علي پٺاڻ چيو ته سندس ڪتاب "شاهه ۽ سٽ ڪهاڻيون" دراصل شاهه عبداللطيف ڀٽائي جي شاعري کي نئين ۽ تخليقي انداز ۾ پيش ڪرڻ جي ڪوشش آهي، جنهن جو مقصد نوجوانن کي پنهنجي ادبي ورثي سان ڳنڍڻ آهي۔ سماجي اڳواڻ سيد خدا ڏنو شاه چيو ته اهڙا ڪتاب سنڌي ادب ۾ فڪري سگهه وڌائين ٿا ۽ پڙهندڙن کي سوچڻ لاءِ نوان پاسا مهيا ڪن ٿا۔عوامي تحريڪ اڳواڻ پره سومرو پنهنجي خطاب ۾ چيو ته "شاهه ۽ سٽ ڪهاڻيون" هڪ منفرد ادبي تجربو آهي، جيڪو مختصر لفظن ۾ وڏي فڪر کي پيش ڪري ٿو۔پروفيسر علي شير گهانگهرو چيو ته شاهه لطيف جي شاعري کي جديد انداز ۾ بيان ڪرڻ ڏکيو ڪم آهي، پر ليکڪ ان کي ڪاميابي سان نڀايو آهي۔پروفيسر منصور علي چيو ته ڪتابن جو عالمي ڏهاڙو ملهائڻ جو مقصد سماج ۾ پڙهڻ جي عادت کي هٿي ڏيڻ آهي، جيڪو علمي ترقي لاءِ ضروري آهي۔پروفيسر نعيم احمد شيخ چيو ته جديد دور ۾ به ڪتابن جي اهميت برقرار آهي ۽ اهي انسان جي فڪري اوسر ۾ اهم ڪردار ادا ڪن ٿا۔ رياض شاهد دايو چيو ته اهڙيون ادبي تقريبون سماج ۾ مثبت تبديلي آڻڻ جو ذريعو بڻجن ٿيون ۽ نوجوانن کي علم ڏانهن راغب ڪن ٿيون۔مهمانن گڏيل طور تي عالمي اديب وليم شيڪسپيئر کي ڀيٽا پيش ڪندي چيو ته سندس ادب صدين کان انسانيت لاءِ راهنمائي جو ذريعو رهيو آهي۔ آخر ۾ سڀني مهمانن ان عزم جو اظهار ڪيو ته هو ڪتابن، علم ۽ ادب جي واڌاري لاءِ پنهنجون ڪوششون جاري رکندا۔ان موقعي تي عبدالخالق ڀٽي قومي گيت، علي مستوئي ،پروفيسر رجب ڀنڊ، سامي ميمڻ ،ڊاڪٽر اصغر ميمڻ، عنايت شاه ۽ ٻين خطاب ڪيو