ملير: رزاق آباد مونو ٽيڪنيڪل ڪاليج تي مبينا قبضي خلاف احتجاج

ملير (رپورٽ: عبدالرشيد مورجھريو) رزاق آباد مونو ٽيڪنيڪل ڪاليج تي ايس ايس يو پوليس جي مبينا قبضي خلاف جيئي سنڌ اسٽوڊنٽس فيڊريشن (جساف) ۽ جيئي سنڌ قومي محاذ شھيد بشير خان قريشي پاران رزاق آباد قومي شاهراهه کان احتجاجي ريلي ڪڍي وئي ريلي جي اڳواڻي جسقم شھيد بشير خان قريشي جو مرڪزي اڳواڻ عزدار چانڊيو، جساف ملير جو صدر وهاب گبول، نائب صدر ثاقب سنڌي ڀورل گبول، نعمان ٽڳڙ جسم اڳواڻ فيض سنڌي ۽ ٻيا ڪري رهيا ھئا ريلي ۾ وڏي تعداد ۾ جسقم ڪارڪنن، جساف جي شاگردن ۽ علائقي واسين شرڪت ڪئي جيڪي بينر ۽ پلي ڪارڊ کڻي سخت نعريبازي ڪري رهيا هئا. احتجاجي ريلي مختلف رستن کان ٿيندي رزاق آباد مونو ٽيڪنيڪل ڪاليج اڳيان پهتي، جتي مظاهرو ڪري ڌرڻو هنيو ويو ان موقعي تي اڳواڻن ميڊيا سان ڳالهائيندي چيو ته رزاق آباد مونو ٽيڪنيڪل ڪاليج ملير ۽ ڀرپاسي وارن علائقن جي نوجوانن لاءِ واحد اهم ٽيڪنيڪل تعليمي ادارو آهي پر ايس ايس يو تعليم کاتي جي ڪجهه عملدارن سان ملي ڀڳت ڪري مبينا طور ڪاليج تي قبضو ڪري ورتو آهي جنهن سبب شاگردن جي تعليم سخت متاثر ٿي رهي آهي هنن الزام هنيو ته ڪاليج جون عمارتون ۽ سهولتون، جيڪي نوجوانن جي فني تعليم لاءِ وقف ڪيون ويون هيون، سي ٻين مقصدن لاءِ استعمال ٿي رهيون آهن، جڏهن ته هزارين شاگرد فني تعليم حاصل ڪرڻ جي حق کان محروم بڻيل آهن. اڳواڻن چيو ته سنڌ ۾ اڳ ئي تعليمي ادارن جي کوٽ آهي، اهڙي صورتحال ۾ تعليمي ادارن کي غير تعليمي مقصدن لاءِ استعمال ڪرڻ نوجوانن جي مستقبل سان ناانصافي آهي هنن وڌيڪ چيو ته جيڪڏهن حڪومت ۽ لاڳاپيل اختيارين فوري طور ڪاليج خالي ڪرائي شاگردن لاءِ بحال نه ڪيو ته احتجاجي تحريڪ جو دائرو وڌايو ويندو. هنن مطالبو ڪيو ته مونو ٽيڪنيڪل ڪاليج کي مڪمل طور تعليم کاتي حوالي ڪري باقاعده تعليمي سرگرميون بحال ڪيون وڃن، جيئن علائقي جا نوجوان فني تعليم حاصل ڪري پنهنجي مستقبل کي سنواري سگهن مظاھرين حڪومت، تعليم کاتي ۽ اعليٰ اختيارين کان مطالبو ڪيو ته معاملي جو نوٽيس وٺي شاگردن جي تعليمي حقن جو تحفظ يقيني بڻايو وڃي، ٻي صورت ۾ سڄي سنڌ ۾ احتجاجن جو سلسلو شروع ڪيو ويندو