خضدار مان اغوا ٿيل سعيد ميمڻ جي بازيابي لاءِ نوشهروفيروز ۾ ريلي

شهرين، وڪيلن، سول سوسائٽي ۽ سعيد ميمڻ جي مائٽن پاران ريلي ڪڍي ڌرڻو هنيو ويو

نوشهرو فيروز (ڊر)بلوچستان مان اغوا ڪيل سنڌ جي اديب، شاعر، دانشور ۽ ريٽائر آفيسر سعيد ميمڻ جي بازيابيءَ لاءِ سول سوسائٽي، شهرين، وڪيلن، صحافين ۽ سندس مِٽن مائٽن پاران نوشهرو فيروز جي مين روڊ ٺاروشاھ اسٽاپ کان اللّٰه واري چوڪ تائين احتجاجي ريلي ڪڍي ڌرڻو لڳايو ويو، جتي مظاهرين اڳواڻن اعظم ميمڻ، بلاول امجد ميمڻ، عبدالشڪور عباسي، يونس راڄپر، وڏيرو نذير احمد ميمڻ، سجاد ميمڻ، عامر حسين ميمڻ، حسيب ميمڻ، ارشاد عباسي، ثاقب ميمڻ، رفيق پيرزادو، اطهر حسين ميمڻ ۽ ٻين چيو ته 29 ڏينهن گذرڻ باوجود سعيد ميمڻ کي بازياب ڪرائڻ ۾ حڪومتي سطح تي ڪابه سنجيده ڪوشش نه ورتي ويئي آهي، لڳي ٿو ته اغواڪار حڪومت ۽ رياست کان طاقتور آهن، جو انهن تائين پهچي نٿو سگهجي. هنن چيو ته روزاني جي بنياد تي نوشهرو فيروز جي مئن روڊ تي سعيد ميمڻ جي بازيابيءَ لاءِ احتجاج ٿي رهيو آهي ۽ پوري سنڌ به سراپا احتجاج آهي. هنن چيو ته سعيد ميمڻ جي اغوا سبب پوري سنڌ جو شعور ۽ سندس مٽ مائٽ سخت پريشان آهن ڇو جو سعيد ميمڻ نه رڳو ريٽائر آفيسر پر سنڌ جو اديب، شاعر ۽ داڻشور آهي. هنن سنڌ، بلوچستان حڪومت، سردار اختر مينگل ۽ بلوچ اڳواڻن کان مطالبو ڪيو ته سعيد ميمڻ جي باحفاظت واپسي تائين سنجيده ڪوششون ورتيون، تيستائين هيءُ احتجاجي سلسلو جاري رهندو.