نوشهروفيروز ۾ سعيد ميمڻ جي بازيابي لاءِ احتجاجي ريلي ڪڍي وئي

ريلي ۾ سول سوسائٽي، شهرين، وڪيلن، صحافين، معصوم ٻارڙن ۽ سعيد ميمڻ جي مائٽن جي شرڪت

نوشهرو فيروز (ڊر) اغوا ڪيل سعيد ميمڻ جي بازيابيءَ لاءِ پريس ڪلب آڏو مظاهرو ڌرڻو، سڀاڻي ڊسٽرڪٽ بار کان مين روڊ مورو تائين ريلي نڪرندي، تفصيل موجب بلوچستان مان اغوا ٿيل سنڌ جي اديب، شاعر، دانشور ۽ ريٽائر آفيسر سعيد ميمڻ جي اغوا کي هڪ مهينو گذري ويو، سندس بازيابيءَ لاءِ ڪي به سنجيده ڪوششون نه وٺڻ تي سول سوسائٽي، شهرين، وڪيلن، صحافين، معصوم ٻارڙن ۽ سندس مِٽن مائٽن پاران پريس ڪلب نوشهرو فيروز آڏو احتجاجي مظاهرو ڪري ڌرڻو هنيو ويو، ان موقعي تي سنڌ بار ڪائونسل جي ميمبر عبدالستار لُهراڻي، اعظم ميمڻ، صدر پريس ڪلب يونس راڄپر، ايڊوڪيٽ محمد شبير خانزادو، جي يو آءِ جي اڪرم علي پيرزادو، سلمان امجد، انيس ميمڻ، زنير ميمڻ، علي نواز سولنگي، خادم سيال، زبير امجد ميمڻ، ثاقب ميمڻ، ڪشن راجا ۽ ٻين چيو ته هڪ مهينو گذرڻ باوجود سعيد ميمڻ جو بازياب نه ٿيڻ سواليه نشاني آهي ته حڪومت ۽ رياستي ادارا ڇا انهن اغواڪارن تائين پهچي نٿا سگهن ڇا؟ اسان ته جمهوري انداز ۾ هڪ مهيني کان پراَمن احتجاج ڪري سعيد ميمڻ جي بازيابي لاءِ گهر ڪري رهيا آهيون. هنن سعيد ميمڻ جي فورن بازيابيءَ جو مطالبو ڪيو. هنن چيو ته سعيد ميمڻ جي اغوا سبب پوري سنڌ ۾ احتجاج ٿي رهيا آهن، هينئر اها اغوا پوري سنڌ جو مسئلو ٿي ويو آهي، ۽ سندس مٽن مائٽن سان گڏ پوري سنڌ سخت پريشان آهي اها پريشاني ختم ڪئي وڃي ٻي صورت ۾ 19 جون جمع ڏينهن شٽربند هڙتال ڪري نيشنل هاءِ وي تي ڌرڻو هنيو ويندو ۽ سڀاڻي 16 جون تي ڊسٽرڪٽ بار نوشهرو فيروز کان مين روڊ مورو تائين ريلي ڪڍي ويندي.