مڪلي جي مختلف علائقن ۾ پاڻي جي بحران بعد ضلعي انتظاميه متحرڪ

ڊي سي ٺٽو سرمد علي ڀاڳت جي هدايت تي ايڊيشنل ڊپٽي ڪمشنر ون عمران الحق پاران واٽر ڪورس جو دورو

ٺٽو (ڊ ر)مڪلي هاشم آباد سوسائٽي ۽ ٻين علائقن ۾ گذريل ڪافي ڏينهن کان جاري پاڻي جي سخت بحران کانپوءِ ضلعي انتظاميا متحرڪ . ڊپٽي ڪمشنر ٺٽو سرمد علي ڀاڳت جي هدايت تي ايڊيشنل ڊپٽي ڪمشنر ون عمران الحق، مڪلي واٽر سپلاءِ کي پاڻي فراهم ڪندڙ واٽر ڪورس جو بائي پاس روڊ مڪلي تي دورو ڪيو ۽ مقامي ڳوٺاڻن سان ڪامياب ڳالهيون ڪري پاڻي جو وهڪرو بحال ڪرائي ڇڏيو، جنهن کانپوءِ مڪلي ۽ هاشم آباد سوسائٽي ڏانهن پاڻي جي فراهمي شروع ٿي وئي آهي. ان موقعي تي اسسٽنٽ ڪمشنر ٺٽو شاڪر فهيم، اي ايس پي ٺٽو، ايس ڊي او آبپاشي ۽ ٽائون ڪميٽي مڪلي جو چيئرمين پير زين العابدين جيلاني پڻ انتظاميا سان گڏ هئا. واضح رهي ته هاشم آباد سوسائٽي مڪلي ۾ پاڻي جي شديد کوٽ خلاف ايڪشن ڪميٽي جي آواز اٿارڻ ۽ عوامي پريس ڪلب ٺٽو جي زبردست ڪوريج بعد انتظاميا خلاف احتجاج جو اعلان ڪيو ويو هو. پر ضلعي انتظاميا پاران مسئلو حل ڪرڻ جي خاطري ۽ مهلت گهرڻ تي ايڪشن ڪميٽي پاران پنهنجو احتجاج هڪ هفتي لاءِ ملتوي ڪيو ويو هو. دوري دوران اها ڳالهه سامھون آئي ته واٽر ڪورس جي آخري حصي (ٽيل اينڊ) تي پاڻي نه ملڻ ڪري مقامي ڳوٺاڻن ڪاوڙ ۾ اچي واٽر سپلائي ڏانھن ويندڙ پاڻي جو وهڪرو بند ڪري ڇڏيو هو، جنهن سبب مڪلي واٽر سپلائي ۽ هاشم آباد سوسائٽي ڏانهن ويندڙ پاڻي مڪمل طور بند ٿي ويو هو ۽ علائقي ۾ ڪربلا جهڙو ماحول پيدا ٿي ويو هو. ايڊيشنل ڊپٽي ڪمشنر ون عمران الحق لاڳاپيل عملدارن سان گڏجي مقامي ماڻهن سان تفصيلي ڳالهيون ڪيون، سندن اعتراض ٻڌا ۽ گڏيل رضامنديءَ سان معاملي کي حل ڪيو. انتظاميا پاران واٽر ڪورس جي "کانٽي" واري ڪم کي مڪمل ڪري مستقل حل ڪڍڻ جي خاطري پڻ ڪرائي وئي، جنهن بعد واٽر ڪورس جو وهڪرو بحال ڪيو ويو.