گوادر میں سیکیورٹی اہلکار کے قتل کیس میں ڈاکٹر ماہ رنگ بلوچ کو عمر قید کی سزا

کوئٹہ (ویب ڈیسک) کوئٹہ کی انسدادِ دہشت گردی عدالت نے بلوچستان کی سماجی کارکن Mahrang Baloch اور Baloch Yakjehti Committee کے رہنما Sibghatullah Shah کو گوادر میں ایک سیکیورٹی اہلکار کے قتل کے مقدمے میں عمر قید کی سزا سنا دی ہے۔ کوئٹہ ون کے جج محمد علی مبین نے پیر کے روز کیس کا فیصلہ سنایا۔ فیصلے کی سماعت کے دوران ڈاکٹر ماہ رنگ بلوچ، دیگر گرفتار رہنماؤں اور ان کے وکلا نے عدالتی کارروائی کا بائیکاٹ کیا، جبکہ کارکن 12 جون سے ضلع جیل ہدہ کے باہر دھرنا دیے ہوئے ہیں۔ ڈاکٹر ماہ رنگ بلوچ کے وکیل اسرار جتک کے مطابق عدالت نے سرکاری طور پر مقرر کردہ وکلا کے ذریعے کارروائی مکمل کی، جسے ملزمان نے ابتدا ہی سے مسترد کر دیا تھا۔ ڈاکٹر ماہ رنگ بلوچ کی بہن نادیہ بلوچ نے فیصلے کو مسترد کرتے ہوئے اسے ’’بغیر مؤثر قانونی نمائندگی والی عدالت‘‘ کا فیصلہ قرار دیا ہے۔ ان کا کہنا تھا کہ جن افراد پر سیکیورٹی اہلکار کے قتل کا براہِ راست الزام تھا، انہیں پہلے ہی بری کر دیا گیا، جبکہ صرف تقاریر کرنے والوں کو سزا سنائی گئی ہے۔ واضح رہے کہ ڈاکٹر ماہ رنگ بلوچ اور صبغت اللہ شاہ کے خلاف یہ مقدمہ 2024 میں گوادر میں ہونے والی ’’بلوچ راجی مچی‘‘ کے دوران ایک سیکیورٹی اہلکار کے قتل کے بعد درج کیا گیا تھا۔ 28 جولائی 2024 کو بلوچ یکجہتی کمیٹی کا احتجاج میرین ڈرائیو پر دھرنے میں تبدیل ہو گیا تھا، جس دوران کارکنوں اور سیکیورٹی اہلکاروں کے درمیان جھڑپیں بھی ہوئی تھیں۔ ڈاکٹر ماہ رنگ بلوچ کو گوادر کیس کے علاوہ دیگر کئی مقدمات کا بھی سامنا ہے۔ ان کے خلاف سریاب تھانے کی حدود میں تین افراد کے قتل کا مقدمہ بھی درج ہے۔ پولیس کے مطابق یہ افراد کمیٹی کے مظاہرین کی فائرنگ سے ہلاک ہوئے تھے۔ ڈاکٹر ماہ رنگ بلوچ کون ہیں؟ ڈاکٹر ماہ رنگ بلوچ بلوچستان میں مبینہ طور پر لاپتا افراد کے حقوق کے لیے آواز اٹھانے والی ایک نمایاں سماجی رہنما ہیں۔ انہوں نے اپنے والد کی گمشدگی اور بعد ازاں تشدد زدہ لاش ملنے کے بعد اس تحریک میں فعال کردار ادا کیا۔ 2023 کے آخر میں انہوں نے اسلام آباد تک تقریباً ایک ہزار میل طویل لانگ مارچ بھی کیا تھا۔ انہیں BBC کی 100 بااثر خواتین کی فہرست اور Time کی "ٹائم 100 نیکسٹ" فہرست میں بھی شامل کیا جا چکا ہے۔