سجاول: سم نالي تي ٺهندڙ پل جي تعميراتي ڪم ۾ سست رفتاري خلاف آبادگارن جو احتجاجي مظاهرو

سجاول (رپورٽر) سجاول کان ٽنڊو محمد خان تائين تعمير هيٺ روڊ منصوبي دوران سم نالي تي ٺهندڙ پل جي تعميراتي ڪم ۾ سست رفتاري خلاف متاثر آبادگارن احتجاجي مظاهرو ڪيو ۽ لاڳاپيل اختيارين کان فوري نوٽيس وٺي تعميراتي ڪم مڪمل ڪرڻ جو مطالبو ڪيو.اطلاعن موجب پل جي تعمير خاطر سم نالي کي عارضي طور بند ڪرڻ سبب پاڻي جو قدرتي وهڪرو متاثر ٿي ويو آهي، جنهن جي نتيجي ۾ پاڻي اوور فلو ٿي ڀرپاسي جي زرعي زمينن ۾ داخل ٿيڻ لڳو آهي. آبادگارن جو چوڻ آهي ته بيٺل فصل پاڻي هيٺ اچڻ سبب سخت متاثر ٿي رهيا آهن، جڏهن ته زرعي نقصان سان گڏ روزاني آمدرفت ۾ به ڏکيائيون پيدا ٿي رهيون آهن.احتجاج جمعيت علماءِ اسلام جي اڳواڻ عبدالغني سومرو جي اڳواڻي ۾ ڪيو ويو، جنهن ۾ وڏي انگ ۾ متاثر آبادگارن ۽ علائقي واسين شرڪت ڪئي. ان موقعي تي اڳواڻن خطاب ڪندي چيو ته پل جي تعميراتي ڪم ۾ غير ضروري دير سبب هارين ۽ آبادگارن جا مسئلا ڏينهون ڏينهن وڌي رهيا آهن، جڏهن ته پاڻي جي نيڪال جو مناسب انتظام نه هئڻ ڪري زرعي زمينون مسلسل متاثر ٿي رهيون آهن.احتجاج ڪندڙن حڪومت، ضلعي انتظاميا ۽ لاڳاپيل تعميراتي اداري کان مطالبو ڪيو ته پل جي تعميراتي ڪم ۾ فوري تيزي آندي وڃي، سم نالي مان پاڻي جي نيڪال جو هنگامي بنيادن تي بندوبست ڪيو وڃي ۽ متاثر آبادگارن کي وڌيڪ مالي نقصان کان بچائڻ لاءِ ترت ۽ عملي قدم کنيا وڃن. هنن خبردار ڪيو ته جيڪڏهن سندن جائز مطالبا جلد پورا نه ڪيا ويا ته احتجاج جو دائرو وڌيڪ وسيع ڪيو ويندو.