ٺتي ۾ ڳوٺ عرس جاکرو واسين جو زمين تي مبينا قبضي خلاف احتجاج

ٺٽو(شفيق ڀٽي)مڪلي ڀرسان ڄام واه موري جي ڳوٺ عرس جاکرو جي رهواسين گل حسن جاکرو ۽ غلام نبي جاکرو عوامي پريس ڪلب ٺٽو ۾ پريس ڪانفرنس ڪندي الزام هنيو آهي ته سندن پاڙيسري قاسم خاصخيلي، رحمان خاصخيلي ۽ ٻين گذريل ڇهن سالن کان سندن اٺ ايڪڙ زرعي سروي واري زمين تي ناجائز قبضو ڪري رکيو آهي. هنن چيو ته مذڪوره زمين بابت معاملو هن وقت عدالت ۾ زيرِ التوا آهي، تنهن هوندي به جوابدار مبينا طور طاقت ۽ اثر رسوخ جي بنياد تي زمين تي قابض آهن. سندن چوڻ موجب، ٻنهي ڌرين وچ ۾ اڳ به مختلف معزز شخصيتن جي موجودگي ۾ ڪيترائي فيصلا ٿيا، جن ۾ تڪراري زمين جاکرو برادري جي ملڪيت قرار ڏني وئي، پر ان باوجود مبينا قبضي جو خاتمو نه ٿي سگهيو. متاثر ڌر مطالبو ڪيو ته معاملو عدالت ۾ هجڻ باوجود مبينا طور طاقت جي زور تي قبضو برقرار رکيو ويو آهي، جنهن سبب کين سخت نقصان پهچي رهيو آهي. هنن ڊپٽي ڪمشنر ٺٽو کان مطالبو ڪيو ته معاملي جو فوري نوٽيس وٺي شفاف جاچ ڪرائي، مبينا قبضي جو خاتمو ڪرائي ۽ کين انصاف فراهم ڪيو وڃي.