نئون ديرو: ڳڙهي خدابخش ڀٽو ۾ ناريءَ سان مبينا جنسي زيادتي، ڪيس داخل، وارثن جو احتجاج

متاثر ناري جي ڀاءُ گلشير لغاري جي فرياد تي علي رضا لغاري خلاف ڳڙهي خدا بخش ڀٽو ٿاڻي تي ڪيس داخل

نئون ديرو ڀرسان ڳڙهي خدابخش ڀٽو ۾ ناريءَ سان ٿيل جنسي ڏاڍائي واري واقعي جو ڳڙهي خدابخش ڀٽو ٿاڻي تي ناري جي ڀاءُ گلشير لغاري جي فرياد تي جوابدار علي رضا لغاري مٿان ڪيس داخل ڪيو ويو آهي. جڏهن ته ڌرين ۾ ڇڪتاڻ واري خدشي سبب اي ايس پي حيدر علي شاھ پاران ڌرين جي گهرن ٻاهران پوليس پارٽي کي مقرر ڪيو ويو آهي. هوڏانهن ڪيس جي فريادي گلشير لغاري پريس ڪلب پهچي احتجاج ڪيو آهي. جتي دانهون ڪندي هنن چيو ته بااثر جوابدار ڌر جا ماڻهون اسان کي مختلف نمبرن تان ڌمڪائي رهيا آهن جڏهن ته بااثر ماڻهون اسان سان گڏ بيهڻ بجاءِ جوابدار ڌر سان ٺاهه لاءِ دٻاءُ وجهي رهيا آهن. هنن الزام هڻندي چيو ته جوابدار ڌر بااثر آهي ۽ اسان کي خدشو آهي ته جوابدار ڌر اثر رسوخ ۽ پئسو استعمال ڪري ميڊيڪل رپورٽ تبديل ڪرائي پنهنجي مرضي مطابق جاري ڪرائي سگهن ٿا. ان ڪري اسان خاتون اول آصفه ڀٽو زرداري، پ پ چيئرمين بلاول ڀٽو زرداري ۽ ايم پي اي فريال ٽالپر کي اپيل ڪئي ته مامري جو فوري نوٽيس وٺي ميڊيڪل رپورٽ پنهنجي نگراني ۾ ڪرائي وڃي ته جيئن ڪو به ان سان هٿ چراند نه ڪري سگهي ۽ اسان جي نياڻي سان ٿيل ظلم تي انصاف ۽ تحفظ ڏنو وڃي.