سنڌي ادبي سنگت شاخ ملير جي دستوري گڏجاڻي

دستوري گڏجاڻي سڪندر سرواڻ جي صدارت هيٺ ٿي گذري

ملير (رپورٽ: عبدالرشيد مورجھريو) سنڌي ادبي سنگت شاخ ملير جي دستوري گڏجاڻي ناليواري ليکڪ سڪندر سرواڻ جي صدارت هيٺ عوامي پريس ڪلب ملير ۾ ٿي، جنهن ۾ شاعرن ۽ اديبن وڏي انگ ۾ شرڪت ڪندي نڪور تخليقون پيش ڪيون جڏهن ته سيد غفور شاهه تقوي، قمبر ٻُٽ، اصغر مهرائي، مجيب سنڌي، مظهر حسين وريائي، امرتا ڏاهري، پنهل پياسي، عبدالغفار عبد ۽ نياز شاهه پنهنجي نڪور شاعري پيش ڪئي، ان موقعي تي سڪندر سرواڻ ڪهاڻي پيش ڪئي، جڏهن ته سامي ميمڻ، ظهير ڏاهري، عنايت علي شاهه، برڪت علي ۽ ٻين پڻ شرڪت ڪئي، صدارتي راءِ ڏيندي سڪندر سرواڻ چيو ته اڄوڪي گڏجاڻيءَ ۾ اعليٰ معيار جي شاعري پيش ڪئي وئي، جنهن ۾ سماجي اڻ برابري، ناانصافين خلاف مزاحمت، حب الوطني ۽ مجازي رنگن کي خوبصورت انداز ۾ اجاگر ڪيو ويو، هن چيو ته نوجوان تخليقڪارن کي پنهنجي ديس، ٻولي ۽ سماجي سجاڳي لاءِ شعوري ۽ ادبي ڪردار ادا ڪرڻ گهرجي. سندس چوڻ هو ته سنڌي ادبي سنگت شاخ ملير پنهنجي ادبي سفر ۾ بهترين ڪارڪردگي جو مظاهرو ڪري رهي آهي ۽ سمورا ميمبر پنهنجي ذميوارين کي خوش اسلوبي سان نڀائي رهيا آهن، گڏجاڻي دوران سيڪريٽري مجيب سنڌي ٻه اهم قراردادون پيش ڪيون، جيڪي متفقه طور منظور ڪيون ويون. پهرين قرارداد ۾ ڪراچي يونيورسٽي جي سنڌي شعبي جي شاگردن ۽ استادن تي ٿيل حملي جي سخت لفظن ۾ مذمت ڪندي چيو ويو ته تعليمي ادارن ۾ تشدد ۽ حملن جا واقعا انتهائي افسوسناڪ آهن ۽ اهي علمي ماحول لاءِ هاڃيڪار آهن، قرارداد ۾ مطالبو ڪيو ويو ته اهڙن واقعن ۾ ملوث عنصرن خلاف قانون موجب سخت ڪارروائي ڪئي وڃي ۽ تعليمي ادارن ۾ پرامن ماحول قائم رکڻ رياست جي ذميواري آهي، ٻي قرارداد ۾ سينئر صحافي عبداش پنهور، راڳي بادل راهي، طفيل سنجراڻي، سنڌي ادبي سنگت شاخ ملير جي ميمبر ۽ شاعر حنيف گلڙي، ۽ شاعر جانب کوسو جو سرڪاري خرچ تي معياري اسپتالن مان مڪمل علاج ڪرائڻ جو مطالبو ڪيو ويو. ان کان اڳ سنڌي ادبي سنگت شاخ ملير جي ڪاروباري ڪاميٽيءَ جو اجلاس نوجوان شاعر قمبر ٻُٽ جي صدارت هيٺ ٿيو، جنهن ۾ گڏيل راءِ سان سينئر شاعر پنهل پياسي جي درخواست منظور ڪندي کيس شاخ جي ميمبرشپ ڏيڻ جو فيصلو ڪيو ويو، صدارتي راءِ ڏيندي قمبر ٻُٽ چيو ته جن ميمبرن کي ذاتي مجبوريون درپيش آهن، انهن سان تنظيمي روايتن موجب نرمي اختيار ڪئي وڃي، جڏهن ته جيڪي ميمبر بنا جواز مسلسل غير حاضر رهن ٿا، تن کي آئين مطابق نوٽيس جاري ڪيا وڃن،نهن چيو ته جيڪڏهن اهڙا ميمبر نوٽيسن باوجود ڪو جواب نه ڏين ته سندن ميمبرشپ ختم ڪرڻ بابت آئيني ڪارروائي ڪئي وڃي.