پ پ اڳواڻ ۽ ضلعي ڪائونسل جي چيئرمين پاران ڳوٺ عارب سولنگي جو دورو

عبدالحميد پنھور محسن هائوس جي انچارج شاهنواز لوهار ۽ پارٽي اڳواڻن ڳوٺ عارب سولنگي جو دورو ڪيو

ٺٽو( محمد شفيق ڀٽي)صوبائي وزير حاجي علي حسن زرداري جي هدايتن تي چيئرمين ڊسٽرڪٽ ڪائونسل ٺٽو ۽ پاڪستان پيپلز پارٽي ضلعي ٺٽي جي سينئر نائب صدر عبدالحميد پنھور، محسن هائوس جي انچارج شاهنواز لوهار ۽ ساڻن گڏ پارٽي اڳواڻن ٺٽو لڳ ڳوٺ عارب سولنگي جو دورو ڪيو، جتي هنن پوليس ڪارروائي کان متاثر ٿيل ڳوٺاڻن سان ملاقات ڪري سندن ڏک سور ٻڌا، واقعي بابت تفصيلي ڄاڻ ورتي ۽ پوليس پاران ڊاهيل گهرن جو معائنو ڪيو. وفد متاثر خاندانن سان يڪجهتي جو اظهار ڪندي کين خاطري ڪرائي ته هو هن ڏکئي وقت ۾ اڪيلا ناهن ۽ پاڪستان پيپلز پارٽي جي قيادت سندن هر ممڪن قانوني، اخلاقي ۽ انساني مدد لاءِ ساڻن گڏ بيٺل آهي. ان موقعي تي ڳالهائيندي چيئرمين ڊسٽرڪٽ ڪائونسل ٺٽو عبدالحميد پنھور چيو ته صوبائي وزير حاجي علي حسن زرداري واقعي جو فوري نوٽيس وٺندي کين متاثر ڳوٺ جو دورو ڪرڻ ۽ متاثرن سان ملاقات ڪرڻ جون هدايتون ڏنيون آهن. هن چيو ته متاثر خاندانن جا مسئلا ۽ مطالبا اعليٰ اختيارين تائين پهچايا ويندا ۽ کين انصاف فراهم ڪرڻ لاءِ هر ممڪن ڪوشش ڪئي ويندي. عبدالحميد پنھور چيو ته جيڪڏهن ڪنهن به ڪارروائي دوران بيگناهه ماڻهن سان زيادتي ٿي آهي، سندن گهر مسمار ڪيا ويا آهن، عورتن ۽ نياڻين جي بي حرمتي يا تذليل ڪئي وئي آهي ته اهو انتهائي افسوسناڪ عمل آهي، جنهن جي منصفاڻي جاچ ٿيڻ گهرجي. هن چيو ته قانون سڀني لاءِ برابر آهي، پر قانون تي عملدرآمد دوران شهرين جي عزت، وقار ۽ بنيادي حقن جو تحفظ يقيني بڻائڻ به رياستي ادارن جي ذميواري آهي. هن وڌيڪ چيو ته پاڪستان پيپلز پارٽي هميشه مظلوم ۽ بي وس ماڻهن سان گڏ بيٺي آهي ۽ ڪنهن به متاثر خاندان کي اڪيلو نه ڇڏيندي. هن چيو ته ڳوٺ عارب سولنگي جي متاثرن کي هر ممڪن امداد، رليف ۽ قانوني سهڪار فراهم ڪرڻ لاءِ لاڳاپيل اختيارين سان رابطا جاري آهن، جڏهن ته صوبائي وزير حاجي علي حسن زرداري پڻ معاملي جي ويجهي نگراني ڪري رهيا آهن ته جيئن متاثر خاندانن کي انصاف ملي سگهي. محسن هائوس جي انچارج شاهنواز لوهار پڻ متاثر خاندانن کي خاطري ڪرائيندي چيو ته سندن تڪليفن ۽ مسئلن کان حڪومت ۽ پارٽي قيادت کي مڪمل طور آگاهه ڪيو ويندو ۽ هر ممڪن رليف، سهڪار ۽ انصاف جي فراهمي لاءِ سنجيده ڪوششون جاري رکيون وينديون. دوري دوران متاثر ڳوٺاڻن وفد کي پنهنجي نقصان، پيش آيل واقعن ۽ مسئلن بابت تفصيلي آگاهي ڏني ۽ انصاف، نقصان جي ازالي ۽ تحفظ فراهم ڪرڻ جو مطالبو ڪيو، جنهن تي وفد کين يقين ڏياريو ته سندن آواز وس وارن تائين پهچايو ويندو ۽ سندن حقن جي تحفظ لاءِ هر ممڪن قدم کنيو ويندو.