سانوڻيءَ جي موسم ۾ شجرڪاري مهم جي شروعات

عمرڪوٽ (رپورٽ:ڪانجي مل رکيسر) برساتن جي خوشگوار موسم ۾ ماحول کي سرسبز ۽ شاداب بڻائڻ ۽ ماحولياتي آلودگي جي خاتمي جي عزم تحت پاڪستان زنده باد بيسڪ آرگنائيزيشن پاڪستان جي باني ۽ مرڪزي اڳواڻ مير نادر علي ابڙو جي هدايتن تي سڄي سنڌ ۾ شجرڪاري مهم جو باقاعده آغاز ڪيو ويو آهي، ان سلسلي ۾ ضلعي عمرڪوٽ ۾ پاڪستان زنده باد بيسڪ آرگنائيزيشن پاڪستان ليڊيز ونگ جي وائيس چيئرپرسن جميلان کوسو مختلف هنڌن تي وڻ پوکي شجرڪاري مهم جو افتتاح ڪيو ۽ عوام کي پڻ وڌ کان وڌ وڻ پوکڻ جي اپيل ڪئي، ان موقعي تي جميلان کوسو خطاب ڪندي چيو ته وڻ قدرت جو انمول تحفو آهن ۽ سرسبز ماحول ئي صحتمند سماج جي ضمانت آهي، هن چيو ته اسان جو مقصد پنهنجي پياري وطن پاڪستان ۽ سنڌ ڌرتي کي وڌيڪَ خوبصورت، سرسبز ۽ آلودگي کان پاڪ بڻائڻ آهي، جيڪڏهن هر شهريءَ پنهنجي گهٽي، پاڙي، اسڪول، مسجد، قبرستان، سرڪاري ادارن ۽ خالي جاين تي گهٽ ۾ گهٽ هڪ وڻ پوکي ان جي سار سنڀال ڪري ته ايندڙ نسلن کي صاف هوا، خوشگوار موسم ۽ بهتر ماحول فراهم ڪري سگهجي ٿو، هن وڌيڪَ چيو ته وڻ رڳو آڪسيجن فراهم نٿا ڪن، پر سخت گرمي دوران گرمي پد گهٽائڻ، فضائي آلودگي ۽ موسمياتي تبديلي جي ناڪاري اثرن کي گهٽائڻ، برساتن جي قدرتي نظام کي بهتر بڻائڻ، زمين جي ڪٽائي روڪڻ ۽ پاڻي جي ذخيرن کي محفوظ رکڻ ۾ پڻ اهم ڪردار ادا ڪن ٿا، هن چيو ته وڻ بيشمار پکين، جانورن ۽ ٻين جاندارن لاءِ پناهه گاهه آهن، جتي کين خوراڪ، ڇانوَ ۽ محفوظ رهائش ملي ٿي، جڏهن ته ميويدار ۽ ڇانوَ وارا وڻ انساني زندگي لاءِ پڻ بيشمار فائدن جا حامل آهن، هن عوام، سماجي تنظيمن، تعليمي ادارن ۽ نوجوانن کي اپيل ڪئي ته هو شجرڪاري کي قومي ذميواري سمجهي هن مهم ۾ ڀرپور حصو وٺن ۽ پوکيل وڻن جي سار سنڀال کي به يقيني بڻائين، جيئن اهي وڌي ويجهي وڏا وڻ بڻجي ماحول جي خوبصورتي ۽ خوشحالي ۾ اضافو آڻي سگهن، هن سنڌ حڪومت، ٻيلا کاتي ۽ ضلعي انتظاميا کان مطالبو ڪيو ته غيرقانوني طور وڻن جي واڍي ۾ ملوث ماڻهن خلاف سخت قانوني ڪارروائي ڪئي وڃي، ڇاڪاڻ ته بي دريغ وڻن جي واڍي ماحولياتي تباهي، وڌندڙ گرمي، فضائي آلودگي ۽ جهنگلي جيوت جي خاتمي جو سبب بڻجي رهي آهي، هن چيو ته شجرڪاري سان گڏ موجوده وڻن جي حفاظت به وقت جي اهم ضرورت آهي، آخر ۾ هن ان عزم جو اظهار ڪيو ته هو وڌ کان وڌ وڻ پوکي ۽ انهن جي حفاظت ڪري هڪ سرسبز، صاف سٿرو ۽ خوشحال پاڪستان جي تعمير ۾ پنهنجو ڀرپور ڪردار ادا ڪندا.