عمرڪوٽ ۾ حضرت امام حسينؑ جي چهلم وڏي عقيدت ۽ احترام سان ملهايو ويو، ھزارين عزادارن جي شرڪت

عمرڪوٽ (رپورٽ:ڪانجي مل رکيسر) ڪربلا جي شهيدن جي چهلم جي موقعي تي ضلعي عمرڪوٽ ۾ حضرت امام حسينؑ ۽ سندس جانثار ساٿين کي ڀيٽا عقيدت پيش ڪئي وئي، مرڪزي ماتمي جلوس پنج پير امام بارگاهه مان برآمد ٿيو، جنهن ۾ هزارين عزادارن، عالمن، ماتمي انجمنن، نوجوانن ۽ اهلِ بيتؑ سان محبت رکندڙ مختلف مڪتبِ فڪر جي ماڻهن وڏي انگ ۾ شرڪت ڪئي، جلوس پنهنجي روايتي رستن تان گذرندي مختلف هنڌن تي پهتو، جتي مجلسونِ عزا، نوحه خواني، سينه زني ۽ زنجير زني جو سلسلو جاري رهيو، جڏهن ته عزادارن لاءِ سبيلن ۽ نياز جو پڻ ڀرپور اهتمام ڪيو ويو، مارڪيٽ چوڪ تي مرڪزي مجلسِ عزا منعقد ڪئي وئي، جنهن کي خطاب ڪندي معروف عالمِ دين علامه مولانا ارشاد علي عرفاني واقعي ڪربلا جي عظمت، فلسفي شهادت، صبر، حق، انصاف ۽ حضرت امام حسينؑ جي لازوال قربانين تي تفصيلي روشني وڌي، هن چيو ته ڪربلا جو پيغام هر دور ۾ ظلم خلاف ثابت قدم رهڻ، حق جو ساٿ ڏيڻ ۽ انسانيت جي سربلندي جو درس ڏئي ٿو، ان کان پوءِ ماتمي جلوس اڳتي وڌيو ته مارڪيٽ چوڪ ۽ الله والا چوڪ تي عزادارن زنجير زني ۽ سينه زني ڪري شهيدنِ ڪربلا کي پرسہ پيش ڪيو، زخمي ٿيندڙ عزادارن کي موقعي تي قائم ميڊيڪل ڪئمپن ۾ فوري طبي امداد فراهم ڪئي وئي، جلوس بخاري امام بارگاهه پهتو، جتي عزادارن نمازِ مغرب باجماعت ادا ڪئي، نماز کان پوءِ جلوس ٻيهر پنهنجي روايتي رستي تان روانو ٿيو ۽ آخرڪار نبن سرڪار امام بارگاهه پهچي اختتام پذير ٿيو، جتي اختتامي مجلسِ عزا منعقد ڪئي وئي، اختتامي مجلس ۾ شهيدنِ ڪربلا کي ڀيٽا عقيدت پيش ڪئي وئي، نوحه خواني ڪئي وئي ۽ ملڪ جي سلامتي، امن، اتحادِ امت ۽ خوشحالي لاءِ خاص دعائون گهريون ويون، چاليهين جي جلوس جي هڪ نمايان خصوصيت هندو برادري جي ڀرپور شرڪت پڻ رهي، جنهن سبيلن ۽ ٻين انتظامن ۾ حصو وٺي عمرڪوٽ جي بين المذاهب هم آهنگي ۽ رواداري جي روايت کي هڪ ڀيرو ٻيهر اجاگر ڪيو، ان موقعي تي سنڌ اسيمبلي جي ميمبر سيد امير علي شاهه پڻ جلوس ۽ مجلسنِ عزا ۾ شرڪت ڪئي، هن عزادارن سان ملاقات ڪئي، انتظامن جو جائزو ورتو ۽ حضرت امام حسينؑ ۽ شهيدنِ ڪربلا جي عظيم قربانين کي امتِ مسلمه لاءِ اتحاد، صبر ۽ حق تي ثابت قدم رهڻ جو دائمي پيغام قرار ڏنو، چهلم جي موقعي تي رينجرز، پوليس، ضلعي انتظاميه ۽ ٻين لاڳاپيل ادارن طرفان فول پروف سيڪيورٽي انتظام ڪيا ويا، جلوس جي سمورن رستن تي اهلڪار مقرر ڪيا ويا، جڏهن ته داخلا ۽ نڪرڻ وارن رستن جي نگراني، طبي امدادي مرڪزن ۽ ريسڪيو ٽيمن جي موجودگي سبب سموريون مذهبي تقريبون پرامن ماحول ۾ پڄاڻي تي پهتيون.