سنڌ جي ناليواري شاعر اديب بيباڪ صحافي شمشير الحيدريءَ جي 14هين ورسي ملھائي وئي

چوڪنڊي قبرستان ۾ شمشير الحيدري جي مزار تي گلن جي چادر چاڙهي ڀيٽا پيش، گلاب جا ٻوٽا بھ لڳايا ويا

ملير (رپورٽ: عبدالرشيد مورجھريو) سنڌ جي نامياري ليکڪ، شاعر، اديب، بيباڪ صحافي ۽ سنڌي ادبي سنگت جي اڳوڻي مرڪزي سيڪريٽري جنرل شمشير الحيدريءَ جي 14هين ورسي جي موقعي تي سنڌ ڪلچرل فورم ڪراچي ڊويزن پاران چوکنڊي قبرستان ۾ سندس مزار تي حاضري ڀري وئي. سنڌ ڪلچرل فورم جي عهديدارن ۽ ساٿين مرحوم جي مزار تي گلن جي چادر چاڙهي فاتحه خواني ڪئي ۽ سنڌ جي خوشحالي، امن ۽ ترقي لاءِ خاص دعائون گهڙيون ان موقعي تي شمشير الحيدريءَ جي ادبي، صحافتي ۽ سماجي خدمتن کي ياد ڪندي کيس شاندار لفظن ۾ خراجِ تحسين پيش ڪيو ويو. تقريب ۾ سنڌ ڪلچرل فورم جي باني چيئرمين، اديب ۽ شاعر صادق لاکو، ڀٽائيءَ جي پارکو شفيع مرگهر، مشتاق خواجا، آفتاب گل عباسي، عوامي پريس ڪلب ملير جي صدر سيد سجاد علي شاهه، سينيئر صحافي سامي ميمڻ، عنايت علي شاهه، سنڌ سڀيتا سگهڙ فورم جي صدر جمشيد زهراڻي، پير محبوب قريشي، ڪامريڊ وهاب گبول، سڄڻ انڙ ۽ ٻين اديبن، شاعرن، صحافين ۽ ادب دوستن وڏي تعداد ۾ شرڪت ڪئي تقريب دوران شاعر ۽ صحافي جمشيد زهراڻي شمشير الحيدريءَ جي مشهور شاعري ۽ بيت پيش ڪري کيس ڀيٽا ڏني، جنهن تي شرڪت ڪندڙن پاران کيس ڀرپور داد ڏنو ويو. سنڌ ڪلچرل فورم جي اڳواڻ صادق لاکو اعلان ڪيو ته شمشير الحيدريءَ جي 14هين ورسيءَ جون تقريبون پنجن ڏينهن تائين جاري رهنديون ۽ 12 آگسٽ تائين مختلف پروگرام منعقد ڪيا ويندا. ان موقعي تي صادق لاکو پاران شمشير الحيدريءَ جي مزار جي احاطي ۾ گلاب جي گلن جا ٻوٽا پڻ پوکيا ويا.