ٿر فائونڊيشن ۽ البصير ڪراچي طرفان اسلام ڪوٽ ۾ اکين جي مفت ڪيمپ قائم

ڪيمپ جي پھرين ڏينھن 400 کان وڌيڪ مريضن جي مفت چڪاس ڪري نظر جا چشما ۽ دوائون ڏنيون ويون

ٿر فائونڊيشن ۽ البصير ڪراچي جي طرفان اسلام ڪوٽ ۾ اکين جي مفت چڪاس ۽ مفت آپريشن لاءِ ٽن ڏهاڙن واري طبي ڪيمپ قائم ڪئي وئي،
ڪيمپ جي پھرين ڏينھن 400 کان وڌيڪ مريضن جي مفت چڪاس ڪري نظر جا چشما ۽ دوائون ڏنيون ويون.
ٿر فائونڊيشن ۽ البصير ڪراچي جي طرفان اکين جي مفت طبي ڪئمپ جي افتتاحي تقريب ٿر فائونڊيشن اسپتال اسلام ڪوٽ ۾ ٿي گذري،
جنھن جو افتتاح ٿر فائونڊيشن جي جنرل مينيجر فرحان انصاري، اسلام ڪوٽ ٽائون جَي چيئرمين ڪمليش ڪمار، سماجي اڳواڻ سبحان سميجَي، گھنشام پارواڻي، فقير منور ساگر ايڊووڪيٽ، ڪلديپ پاروواڻي، ڊاڪٽر شنڪر وانڪواڻي ، عبدالغني بجير ۽ ٻين ڪيو.
تقريب کي خطاب ڪندي جنرل منيجر ٿر فائونڊيشن فرحان انصاري چيو ته ٿر فائونڊيشن طرفان اڳ به علائقي ۾ صحت جون مفت سهولتون فراهم ڪيون پيون وڃن، ۽ انهي سلسلي ۾ اکين جي مفت چڪاس ڪيمپ قائم ڪئي وئي آھي
جتي ضرورتمندن جا مفت آپريشن پڻ ڪيا ويندا. اسلام ڪوٽ ٽائون جي چيئرمين ڪمليش ڪمار چيو ته ٿر فائونڊيشن جس لهڻي جنهن علائقي جي غريب عوام لاءِ ڪئمپ قائم ڪئي،
الخدمت فائونڊيشن جي سبحان سَميجَي چيو ته انسان کي رب پاڪ طرفان مليل نعمتن مان وڏي نعمت اکين جي نظر آهي، جيڪڏهن انهي جو علاج ٿئي ٿو ته ان کان وڏي ڪا به خدمت ناهي،
ٿر فائونڊيشن طرفان ڪئمپ لڳائڻ ساراھ جوڳو قدم آهي. ان موقعي تي ڳالھائيندي ڊاڪٽر شنڪر وانڪواڻي چيو ته ٿر فائونڊيشن جو هي قدم عوامي ڀلائي لاءِ آهي جنهن تي سموري ٽيم جس لهڻي.
فقير منور ساگر ايڊووڪيٽ پڻ ٿر فائونڊيشن طرفان اکين جي ڪيمپ قائم ڪرڻ واري عمل کي ساراھيو.
تقريب کي ٿر فائونڊيشن جي ڊپٽي مينيجر مُبشر سومرَي، هيلٿ آفيسر فياض شيخ، عبدالستار لنجَي۽ ٻين پڻ خطاب ڪيو. ڪئمپ جي پهرين ڏهاڙي تي ٽوٽل 400 مريضن جي مفت چڪاس ڪئي وئي، جنھن مان 30 سيڪڙو مريضن کي نظر جا چشما ۽ 70 سيڪڙو مريضن کي مفت دوائون ڏنيون ويون،
ان کان علاوه ڊاڪٽرن موجب 41 مريضن جو آپريشن ڪيو ويندو، مفت طبي ڪيمپ ٽن ڏھاڙن تائين تائين جاري رهندي.