ڊپٽي ڪمشنر محمد ارسلان سليم پاران ٽرانسپورٽرن کي ڀاڙا گھٽائڻ جي ھدايت

ڊيزل ۽ پيٽرول جي اگهن ۾ گهٽتائي جي ڪري ڀاڙن ۾ گھٽتائي آندي وڃي: محمد ارسلان سليم

نوشهرو فيروز (ڊر) ڊپٽي ڪمشنر محمد ارسلان سليم ضلعي جي پبلڪ ٽرانسپورٽ مالڪن کي هدايت ڪئي آهي ته اهي فوري طور تي ڊيزل ۽ پيٽرول جي اگهن ۾ گهٽتائي ڪري ڀاڙا گهٽائين، ٻي صورت ۾ سندن خلاف ڪارروائي ڪئي ويندي. هن سمورن ٽرانسپورٽرن کي چيو ته فوري طور تي پبلڪ ٽرانسپورٽ مان سي اين جي ۽ ايل پي جي سلينڊر هٽايا وڃن ٻي صورت ۾ انهن خلاف ڪارروائي ڪري گاڏيون بند ڪيون وينديون. هو اڄ پنهنجي آفيس ۾ سيڪريٽري ريجنل ٽرانسپورٽ اٿارٽي ۽ ٽرانسپورٽرن جي اجلاس کي خطاب ڪري رهيو هو. اجلاس ۾ ڊي ايس پي موٽر وي پوليس قمر زمان کوسو، سمورن تعلقن جي اسسٽنٽ ڪمشنرن ۽ ٽريفڪ سارجنٽ شرڪت ڪئي. اجلاس کي خطاب ڪندي ڊپٽي ڪمشنر چيو ته حڪومت پيٽرول ۽ ڊيزل جي قيمتن ۾ گهٽتائي ڪري عوام کي رليف ڏنو آهي، اهو رليف ڀاڙن ۾ گهٽتائي جي صورت ۾ عام مسافرن تائين پهچڻ گهرجي. هن سمورن ٽرانسپورٽ مالڪن کي هدايت ڪئي ته ڀاڙن جي لسٽ ٽرانسپورٽ جي اڏن ۽ گاڏين ۾ نمايان جاءِ تي لڳائين. سيڪريٽري ريجنل ٽرانسپورٽ اٿارٽي ۽ اسسٽنٽ ڪمشنر ڀاڙا چيڪ ڪندا ۽ وڌيڪ ڀاڙا وصول ڪندڙن خلاف ڪارروائي ڪئي ويندي. ڊپٽي ڪمشنر هدايت ڪئي ته سمورن پبلڪ ٽرانسپورٽ مان سي اين جي ۽ ايل پي جي سلينڊر فوري طور تي هٽايا وڃن، هن سمورن ٽرانسپورٽرن کي هدايت ڪئي ته هو سيڪريٽري ريجنل ٽرانسپورٽ اٿارٽي جي آفيس کان فٽنيس سرٽيفڪيٽ ۽ روٽ پرمٽ حاصل ڪن ۽ اسسٽنٽ ڪمشنرن کي هدايت ڪئي ته اهي ٽرانسپورٽرن خلاف ڪارروائي ڪئي وڃي جيڪي وڌيڪ ڀاڙا وصول ڪن انھن جي خلاف روزاني جي بنياد تي ڪاروائي ڪئي وڃي.