نوشهروفيروز باءِ پاس وٽ ڌرڻو، نوان ڪئنال منصوبو سنڌ جي هزارين سالا تهذيب کي برباد ڪرڻ جي سازش آهي: ڊاڪٽر نياز ڪالاڻي

جسقم ڪارڪنن پاران ريلي ڪڍي باءِ پاس وٽ ڌرڻو هنيو ويو، هزارين ماڻهو شريڪ

نوشهروفيروز(ڊ ر) سنڌو درياءَ مٿان ٺهندڙ ڪئنالن خلاف جيئي سنڌ قومي محاذ جي ھزارين ڪارڪنن باء پاس نوشهروفيروز وٽ ڌرڻو ھڻي قومي شاهراھ کي ڪيترن ئي ڪلاڪن لاءِ بند ڪري ڇڏيو، جنھن سبب قومي شاهراھ تي ٽريفڪ معطل ٿي وئي ۽ گاڏين جون ڊگهيون قطارون لڳي ويون. جسقم ڪارڪنن پھريان پريس ڪلب نوشهروفيروز وٽان احتجاجي ريلي ڪڍي. ريلي شھر جو گشت ڪرڻ بعد چار ڪلوميٽر پيدل مارچ ڪرڻ بعد باء پاس نوشهروفيروز وٽ پھتي جتي ڪارڪنن جسقم جي مرڪزي اڳواڻن ڊاڪٽر نياز ڪالاڻي، سرفراز ميمڻ، اياز راڄپر، امتياز کوسو ،فقيرامداد منگي ۽ رواداري تحريڪ جي اڳواڻ پنھل ساريو، راڳي وقار ملاح ۽ ٻين جي اڳواڻيءَ ۾ ڌرڻو ھنيو ويو. ان موقعي تي خطاب ڪندي ڊاڪٽر نياز ڪالاڻي چيو ته سنڌو دريا اسان جي ساھ جي رڳ آھي ۽ 6 ڪئنال اڏي سنڌوءَ جو منھن موڙي سنڌوءَ جي ھزارين سالن جي تھذيب کي برباد ڪرڻ جي سازش ڪئي پئي وڃي. ھن چيو ته پنجاب پنھنجو پاڻي اڳئي وڪرو ڪري چڪو آھي ۽ سدائين سنڌ جي پاڻي تي ڌاڙا ھنيا آھن. جنھن سبب سنڌو جي ڊيلٽا تباھ ٿي وئي آهي ۽ سنڌ جي لکين ايڪڙ زمين سمنڊ ڳھي ويو آھي. لکين ماڻھو پاڻي نه ھجڻ ڪري دربدر آھن. سنڌ جي جھنگلي جيوت ذري گھٽ ختم ٿي وئي آھي. پاڻي جي کوٽ سبب سنڌ جي ذريعي معيشت سخت متاثر آھي. سنڌ کي پنھنجي حصي جو پاڻي نه ٿو ملي. اھڙي صورت ۾ وري ڪئنال اڏي باقي سنڌوءَ جو منھن موڙيو ويندو جنھن کي سنڌ جا ماڻھو ڪنھن به صورت ۾ قبول نه ڪندا. رواداري تحريڪ جي اڳواڻ پنھل ساريو چيو ته پنجاب سدائين سنڌ جي وسيلن ۽ پاڻي تي ڌاڙا ھنيا آھن. سنڌ وسيلن سان مالا مال ھجڻ باوجود سنڌ ۾ گئس، بجلي ناھي، ماڻھو پيئڻ جي پاڻي لاءِ پريشان آھن. ھن چيو ته پنجاب پنھنجي ھوڏ تان نہ لٿو ته ھي ملڪ به نه رھندو. ھن چيو ته سنڌو بچائڻ لاءِ لکين ماڻھو احتجاج ڪري رھيا آھن جيڪي ڪئنال اڏڻ وارو اعلان واپس نه ورتو ويو ته پوءِ پنجاب جا رستا بند ڪيا ويندا. راڳي وقار ملاح چيو ته سنڌ جا ماڻھو ڪڏھن به وفاق کي ڪئنال اڏڻ نه ڏيندا، ڇاڪاڻ ته ڪئنال منصوبو ڪالا باغ ڊيم کان به وڌيڪ خطرناڪ آھي. ڌرڻي ۾ راڳي وقار ملاح قومي گيت ڳائي ڪارڪنن کي جهومائي ڇڏيو. ٻئي پاسي ڌرڻي سبب قومي شاهراھ تي گاڏين جون ڊگهيون قطارون لڳي ويون جيڪي ڪيترن ڪلاڪن سبب روڊ جي ٻنهي پاسن سان بيٺل رهيون ۽ ڪيترن ڪلاڪن کان پوءِ سنڌو درياءَ تي ڪئنال اڏڻ خلاف ھنيل ڌرڻو ڊاڪٽر نياز ڪالاڻي ختم ڪندي 29 نومبر تي ٽنڊوالهيار ۾ ريلي ۽ 15 ڊسمبر تي قاضي احمد ۾ قومي شاهراھ تي ڌرڻو ھڻڻ جو اعلان ڪندي چيو ته جيستائين ڪئنال اڏڻ تان ھٿ نه کنيو ويندو، احتجاج جاري رھندو.