آصف علي زرداري سنڌين جي نسل ڪشي لاءِ 6 نوان ڪئنال ٺاھڻ جي منظوري ڏئي موت جو پروانو جاري ڪيو: اياز لطيف پليجو

سنڌي نوجوان سنگت دبئي پاران اياز لطيف پليجي جي مان ۾ فجيرا شهر ڀرسان مسافي جي پهاڙين ۾ آجياڻو

حيدرآباد (بيورو) سنڌي نوجوان سنگت دبئي پاران قومي عوامي تحريڪ جي سربراھ اياز لطيف پليجو جي مان ۾ فجيرا شھر جي ڀرسان مسافي واري علائقي جي پھاڙين ۾ شاندار آجياڻو ڏنو ويو ۽ کيس سنڌ جي ثقافت اجرڪن، لنگهين ۽ سنڌي ٽوپين جا تعفا ڏنا آجياڻي ۾ دبئي ۾ رھنڌڙ مختلف ڪاروباري شخصيتن پڻ شرڪت ڪئي. ان موقعي تي اياز لطيف پليجي ڳالھائيندي چيو تہ آصف علي زرداري سنڌي ماڻهن جي نسل ڪشي لاءِ سنڌو درياھ مان 6 نوان ڪئنال ٺاھڻ جي منظوري ڏئي موت جو پروانو جاري ڪري ڇڏيو آهي. سنڌو درياءَ قتل ٿيڻ سان ڪروڙين زندگيون، سنڌ جي ھزارين سالا ثقافت ۽ تھذيب موت جو گرھ بنجي ويندي سنڌ جي پاڻي تي ڌاڙا ھڻي لکين ايڪڙ سنڌ جي زمين ڀڙڀانگ ڪئي وئي آھي. سنڌو درياھ مان وڌيڪ 6 نوان ڪئنال ڪڍڻ سان درياھ مڪمل سوڪھڙي جو شڪار ٿي ويندو جنھن سان سنڌ ايٿوپيا، صوماليا ۽ ريگستان بڻجي ويندي سنڌو درياھ سنڌ ۽ سنڌين جو جياپو آهي جيستائين ھڪ بہ سنڌي زنده هوندو تيستائين پنهنجي درياھ کي قتل ٿيڻ نہ ڏيندا. اياز لطيف پليجي چيو تہ دنيا جي مختلف ملڪن ۾ رهندڙ 3 ڪرڙو سنڌي پنهنجي سنڌو درياھ کي بچائڻ لاءِ ڀرپور نموني جدوجھد ڪن ۽ پاڪستاني سفارتخاني جي اڳيان احتجاجي مظاهرا، ريليون ۽ بک هڙتالون ڪري ياداشت نامون پيش ڪن. ڪوٽڙي کان ھيٺ ڊائون اسٽريم ۾ پاڻي جو ڇوڙ فطري آھي، اھو فطري ڇوڙ بند ڪرڻ سبب سمنڊ لکين ايڪڙ زمين ڳڙڪائي اڳتي وڌي آيو آھي ۽ زير زمين پاڻي زھريلو ٿي ويو آھي. اياز لطيف پليجي چيو تہ پيپلزپارٽي جي مسلسل چوٿين حڪومت ھلي رھي آھي، جنھن جو نتيجو آھي جو ڌاڙيل ۽ منشيات فروش وڌيڪ مضبوط آھن ۽ قانون انھن جي اڳي ڪمزور آھي. غريب ماڻھن انصاف کان محروم آھن. ڪرپشن سبب پوليس ۾ ڏوھاري عنصر شامل ٿي ويا آھن، جيڪي خود ڏوھن جي سرپرستي ڪري رھيا آھن. انصاف نہ ھجڻ ڪري اسان جو سماج انارڪي جو شڪار ٿي رھيو آھي.اياز لطيف پليجي چيو تہ ملڪ ڏينھن ڏينھن بحرانن جي ور چڙھي رھيو آھي. بيڊ گورننس جي ڪري معاشي بحران شديد ٿي رھيو آھي.اسان کانپوءِ آزاد ٿيل ملڪ ترقي ۾ اڳتي آھن. بک، بدحالي ۽ بيروزگاري پاڪستان جي ماڻھن جي مقدر بنجي وئي آھي. ڪرپشن جي ڪري اسين مسئلن ۽ مصيبتن جو شڪار آھيون. اياز لطيف پليجي چيو تہ سنڌ ۾ پوليس کي بيوس ۽ لاچار بنايو ويو آھي، جنھنڪري ڏوھاري طاقتور ٿي ويا آھن. منشيات فروشن شھر شھر کي پنھنجي منڊي بنائي ڇڏيو آھي. نوجوان نسل تباھ ٿي رھيو آھي.