نااھل حڪمران آئي ايم ايف جي ايجنڊا تي ھلي عوام دشمن معاشي پاليسيون جوڙي مھانگائي جا طوفان برپا ڪري رھي آھي: اياز لطيف پليجو

اياز لطيف پليجي پاران آئي ايم ايف جي چوڻ تي سنڌ ۾ زرعي ٽئڪس لاڳو ڪرڻ تي افسوس جو اظهار

حيدرآباد(بيورو) قومي عوامي تحريڪ جي سربراھ اياز لطيف پليجي آئي ايم ايف جي چوڻ تي سنڌ ۾ زرعي ٽئڪس لاڳو ڪرڻ تي افسوس اظهار ڪندي چيو آھي تہ ايندڙ وقت وڌيڪ سنڌ سميت ملڪ لاءِ ڏکيو آھي. نااھل حڪمران آئي ايم ايف جي ايجنڊا تي ھلي عوام دشمن معاشي پاليسيون جوڙي مھانگائي جا طوفان برپا ڪري رھي آھي.اسان کي بہ سڀ کان پھرين پنھنجي خودمختياري، پنھنجا مفاد، پنھنجا ماڻھو ۽ انھن جي خوشحالي، پنھنجي معيشت عزيز ھجڻ گھرجي پر افسوس جيڪي بہ حڪمران اچن ٿا اھي ٻاھرين ڊڪٽيشنز تي ھلي ملڪ کي غلام بنائي ڇڏين ٿا. اياز لطيف پليجي چيو تہ آئي ايم ايف جا مفاد اسان جي معيشت جي چيلھ ڀڃي رھيا آھن. اسان کي پنھنجي آزاد خودمختيار پاليسيون جوڙي اڳتي وڌڻو پوندو. ٻاھرين ڊڪٽيشن کي جيئن جو تيئن قبول ڪرڻ سان اسين ٻين ملڪن کان پوئتي آھيون.سنڌ جي زرعي معيشت جي تباھي جي ذميوار وفاق ۽ سنڌ حڪومت آھي. زرعي معيشت جي تباھي جي ڪري لکين خاندان غربت ۽ بيروزگاري جو شڪار آھن. سنڌ جي آبادگارن مٿان ناجائز زرعي ٽئڪس جو بار وڌو ويو آھي. اياز لطيف پليجي چيو تہ ملڪ کي ٻاھرين ڊڪٽيشن تي ھلائڻ ڪري اسان جون پاليسيون آزاد، خودمختيار ۽ عوام دوست ناھن. آئي ايم ايف پنھنجن مفادن واريون پاليسيون جوڙين ٿا ۽ پاڪستان کي بحرانن جي ڪن ۾ اڇلائي رھيا آھن.