سنڌ حڪومت ۽ نادرا پاران ممتا پروگرام تحت 13 لک مائرن جي رجسٽريشن لاءِ معاهدو

ڪراچي (اسٽاف رپورٽر) سماجي تحفظ جي خدمتن کي بهتر بڻائڻ لاءِ سنڌ سوشل پروٽيڪشن اٿارٽي (SSPA) ۽ نادرا، حڪومت پاڪستان هڪ معاهدو ڪيو آهي، جنهن جي تحت نادرا پاران سنڌ جي 15 ضلعن ۾ ممتا پروگرام هيٺ 13 لک مستحق مائرن جي رجسٽريشن ۾ سهولت فراهم ڪئي ويندي. هي معاهدو ڪراچي ۾ ٿيل هڪ سرڪاري تقريب دوران SSPA جي CEO سميع الله شيخ ۽ نادرا جي پروگرام مئنيجر جنيد شوڪت وچ ۾ صحيح ڪيو ويو. نادرا سنڌ جي ايڊیشنل ڊائريڪٽر جنرل ۽ ٻنهي ادارن جا سينيئر عملدار پڻ تقريب ۾ موجود هئا. ھن معاھدي موجب سنڌ جي لکين مستحق عورتن جي سھائتا لاءِ نوان رستا هموار ڪيا وڃن، جيڪي ممتا پروگرام تحت مالي امداد حاصل ڪرڻ لاءِ اهل آهن پر سڃاڻپ ڪارڊ جي عدم موجودگي سبب فائدو وٺي نه سگهن ٿيون. معاهدي تحت مستحق عورتن جي شناختي ڪارڊ جي تصديق ڪئي ويندي، جيڪا رجسٽريشن جي عمل کي تيز، شفاف ۽ اثرائتو بڻائيندي ۽ مالي امداد جي ورڇ کي يقيني بڻائيندي. ان سان گڏ، SSPA کي فائدو ٿيندو ته هو پنهنجو ڊيٽابيس وڌيڪ بهتر بڻائي، جيئن سنڌ جي سماجي تحفظ جي نظام کي وڌيڪ مضبوط بڻائي سگهجي. تقريب دوران ڳالهائيندي، SSPA جي CEO سميع الله شيخ زور ڏنو ته هي شراڪت سنڌ جي عورتن ۽ ٻارن لاءِ سماجي تحفظ جي پروگرام ۾ وڌيڪ شفافيت ۽ آساني پيدا ڪندي. هن اميد ظاهر ڪئي ته نادرا انهن 15 مداخلتي ضلعن ۾ سڃاڻپ ڪارڊ ۽ فارم-بي جاري ڪرڻ کي ترجيح ڏيندو، جتي ممتا پروگرام اڳ ۾ ئي لاڳو ڪيو ويو آهي. نادرا جون موبائل رجسٽريشن وينون پڻ متحرڪ ڪيون وينديون، ته جيئن ڳورھاري ۽ ٿڃ پياڪ مائرن جي رجسٽريشن جلدي مڪمل ڪري سگهون.هن وڌيڪ چيو ته هي معاهدو رجسٽريشن جي عمل ۾ پيدا ٿيندڙ رنڊڪن کي دور ڪرڻ ۾ مدد ڪندو، ۽ ڪو به اهل مستحق عورت صحت جي سهولتن کان محروم نه رهندي. "نادرا جي سھڪار سان، اسان ممتا پروگرام کي وڌيڪ جامع ۽ سولو بڻائي رهيا آهيون،" هن وڌيڪ چيوتہ ھن شراڪت حڪومت سنڌ جي ان عزم کي ٻيهر ورجائي ٿي ته ڪا به عورت يا ٻار صحت ۽ مالي سهائتا کان محروم نه رهي. نادرا جي پروگرام مئنيجر جنيد شوڪت پڻ پنهنجي عزم جو اظهار ڪندي چيو ته نادرا سماجي تحفظ جي قدمن ۾ اڳواٽ بهتري آڻڻ لاءِ بهتر ڊيٽا مئنيجمينٽ ۽ رجسٽريشن خدمتون فراهم ڪندو. "اسان ممتا پروگرام جي اهميت کي سمجهون ٿا ۽ چاهيون ٿا ته وڌيڪ عورتون هن حڪومت جي صحت واري منصوبي مان فائدو حاصل ڪن،" هڪ نادرا عملدار چيو. تقريب ۾ نادرا ۽ SSPA جا ٻين سينئر عملدار به موجود هئا، جن ۾ ماجد رضوي، پروجيڪٽ مئنيجر نادرا، نسيم ميراني، ايڊیشنل سيڪريٽري سوشل پروٽيڪشن ڊپارٽمينٽ، راشد محمود، ڊاڪٽر ڪامران بيگ، مهتاب ڀٽي، فرخ بشير، نويد ميمڻ، ۽ محترمه هما هاليپوٽو شامل هئا.