ڏوڪري ۾ رٽائرڊ استاد جو گهرڀاتين سميت بئنڪ عملي خلاف احتجاج

رٽائرڊ استاد محمود علي ڀٽي لاڙڪاڻي جي بئنڪ عملي مٿان لکين رپين جي فراڊ جو الزام

ڏوڪري(رپورٽر) ڏوڪريءَ جي ڏيرا پاڙي جي رهواسي رٽائرڊ استاد پنهنجي زال، معصوم نياڻين ۽ پٽن سميت ايڇ بي ايل برانچ لاڙڪاڻي خلاف احتجاج ڪيو آهي.ڏوڪري ڏيرا پاڙي جي رهواسي محمود علي ڀٽي پنهنجي زال، معصوم نياڻين ۽ پٽن سميت ڏوڪري پريس ڪلب اڳيان لاڙڪاڻي ايڇ بي ايل عملي مٿان لکين رپين جي فراڊ ڪرڻ جو الزام لڳائيندي چيو ته گذريل سال آگسٽ مهيني ۾ آءُ جڳھ جي اڏاوت لاءِ ايڇ بي ايل مائڪرو فنانس برانچ لاڙڪاڻي کان قرض طور ڏھ لک منظور ڪرايا ھئا جنهن دوران بئنڪ عملي پاران مونکي ﷲ ڏني نالي ھڪ شخص جو بند ٿيل اي ٽي ايم ڪارڊ ڏنو. ھن الزام لڳايو ته بئنڪ عملي طرفان مونکي غلط ڪارڊ ڏيڻ جي نتيجي دوران منهنجي اڪائونٽ مان ساڍا پنج لک رپيا ڪڍايا ويا آهن اهڙو اطلاع مان بئنڪ مئنيجر کي ڏيڻ سان گڏ ھيڊ آفيس اسلام آباد پڻ ڪئي آهي، جتان مونکي جواب ڏنو ويو آهي ته توهان جو ڪيس ايف آئي اي حوالي ڪيو آهي پر هن وقت تائين ڪوئي تدارڪ ناهي ڪيو ويو. هن مطالبو ڪيو ته معاملي جو نوٽيس وٺي منهنجي نالي سان اي ٽي ايم ڪارڊ جاري ڪرڻ سان گڏ نڪتل رقم واپس ڪرائي انصاف ڪيو وڃي.