سنڌ جو نالي وارو راڳي ذوالفقار راھي لاڏاڻو ڪري ويو

سجاول (رپورٽر) سنڌ جو نالي وارو راڳي ذوالفقار راھي لاڏاڻو ڪري ويو. ذوالفقار راھي کي گذريل ڏينھن اوچتو طبيعت خراب ٿيڻ ڪري مڪلي اسپتال منتقل ڪيو ويو جتي ھو لاڏاڻو ڪري ويو. ويجھن ذريعن موجب ذوالفقار راھي ڪجھ عرصي کان هيپاٽائيٽس سي بيماري ۾ مبتلا ھو، گذريل ڏينھن اوچتو سندس پيرن تي سوڄ ٿي پئي، جنھن تي کيس مڪلي اسپتال منتقل ڪيو ويو تہ اتي جگر جي ڦاٽڻ سبب ھو لاڏاڻو ڪري ويو. ذوالفقار راھي نالي واري فنڪار مرحوم رمضان راھي جو فرزند ھو جنھن پنھنجي منفرد گائڪيءَ سبب سموريءَ سنڌ ۾ مشھوري ماڻي. سندس ڳايل ڪلامن جون سوين ڪيسٽون پڻ ريليز ٿيون جن وڏي مقبوليت ماڻي. مرحوم جو جنازو سجاول مان سندس اباڻي گھر مان کنيو ويو ۽ سجاول ۾ ئي جنازي نماز ادا ڪرڻ بعد سندس مڙھ کي مڪلي قبرستان ۾ مٽيءَ ماءُ حوالي ڪيو ويو. مرحوم جي جنازي ۾ سجاول جي شاعرن، اديبن، فنڪارن، صحافين، استادن ۽ سياسي سماجي اڳواڻن سميت شھرين وڏي انگ ۾ شرڪت ڪئي. ٻئي پاسي سجاول ۾ آرٽ سان لاڳاپيل ڌرين ۾ ذوالفقار راھي جي وفات تي غم جي لھر ڇانيل ھئي.