وفاق ۽ پنجاب سنڌ تي حملي آور آھن. ڪئنال منصوبا سنڌ کي قبرستان بڻائي ڇڏيندا: اياز لطيف پليجو

اياز لطيف پليجي پنجاب حڪومت پاران بجيٽ ۾ سنڌ دشمن منصوبن لاءِ پئسا رکڻ جي مذمت

حيدرآباد(بيورو)قومي عوامي تحريڪ جي سربراھ اياز لطيف پليجي پنجاب حڪومت پاران بجيٽ ۾ سنڌ دشمن منصوبن چولستان، چوبارہ، جلال پور ڪئنالن لاءِ پئسا رکڻ جي مذمت ڪندي چيو آھي تہ وفاق ۽ پنجاب سنڌ تي حملي آور آھن. ڪئنال منصوبا سنڌ کي قبرستان بنائي ڇڏيندا. چولستان سميت 6 نوان ڪئنال ملڪ خلاف وڏي سازش آھن. وفاق ۽ پنجاب جو ڪردار سنڌ لاءِ اسرائيل جھڙو آھي. سنڌ کي ھڪ طرف مال غنيمت بنائي لٽيو پيو وڃي ٻئي طرف درياھ تي ڌاڙي ھڻڻ جا منصوبا جوڙي ڪروڙين ماڻھن کي اڃ ۽ بک وگھي مارڻ جي سازش ڪئي پئي وڃي. اياز لطيف پليجي چيو تہ سنڌ جي ماڻھن وٽ 2 رستا آھن يا اھي خاموش ٿي قاتل منصوبا قبول ڪن يا سنڌ ۽ پنھنجي نسلن جي بقا لاءِ مستقل جدوجھد جي ميدان تي اچي سمورا قاتل منصوبا ختم ڪرائين. اياز لطيف پليجي چيو تہ ڪروڙين ماڻھو چولستان سميت 6 نوان ڪئنال رد ڪري چڪا آھن. وفاقي حڪومت سنڌ جي ماڻھن کي خاطري ڪرائي چڪي آھي تہ ڪو بہ ڪئنال نہ ٺاھيو ويندو، ان باوجود پنجاب حڪومت پاران تڪراري ۽ قاتل منصوبن خلاف بجيٽ ۾ پئسا رکڻ کليل سنڌ دشمني آھي. جنھن جي جيتري بہ مذمت ڪجي گھٽ آھي. اياز لطيف پليجي چيو تہ سنڌ فتح ڪيل علائقو ناھي. سنڌ جي احتجاج ۽ آواز کي نظرانداز نہ ڪيو وڃي. فوري طور تي ڪينالن لاءِ رکيل بجيٽ واپس ڪئي وڃي.