ٺٽي ۾ آبپاشي کاتي جي بيلدار جي اڳواڻي ۾ پوليس خلاف احتجاجي مظاهرو

ٺٽو (محمد شفيق ڀٽي)آبپاشي کاتي جي بيلدار محمد شريف لاشاري پنهنجي ساٿين سان گڏ عوامي پريس ڪلب ٺٽو تي احتجاج ڪندي الزام هنيو آهي ته ايس ايڇ او مڪلي انور شر 16 آگسٽ 2025 تي سندس رهائش گاھ جيلاني ھائوس مڪلي تي وڏن پوليس دستن سان ڇاپو هڻي کيس گرفتار ڪيو ۽ ٽن ڏينهن تائين لاپتا ڪري ڇڏيو۔محمد شريف لاشاري موجب سندس عزيزن عدالت ۾ درخواست ڏني، جنهن تي سندس بازيابي لاءِ عدالت سڳوري جي معزز جج مختلف هنڌن تي ڇاپا هنيا ويا۔ بعد ۾ 19 آگسٽ 2025 تي پوليس کيس عدالت ۾ پيش ڪري وڌيڪ رمانڊ جي درخواست ڪئي، پر عدالت رمانڊ ڏيڻ کان انڪار ڪيو، جنهن کانپوءِ هو ضمانت تي آزاد ٿي ويو۔بيلدار الزام لڳايو ته گرفتاري دوران کيس سخت تشدد جو نشانو بڻايو ويو، جڏهن ته ڇاپي دوران سندس 2025 ماڊل 125 موٽر سائيڪل، ٻه توله سون، ٽي چانديءَ جون منڊيون، پنجاهه هزار رپين جي قيمت جو انفنڪس موبائل فون، قومي سڃاڻپ ڪارڊ ۽ ڊيوٽي ڪارڊ به پوليس ساڻ کڻي وئي۔محمد شريف لاشاري ايس ايس پي ٺٽو، ڊي آئي جي حيدرآباد، آءِ جي سنڌ ۽ ٻين اختيارين کان مطالبو ڪيو آهي ته کيس انصاف فراهم ڪيو وڃي، سندس خلاف داخل مبينه ڪوڙو ڪيس ختم ڪيو وڃي، ايس ايڇ او خلاف قانوني ڪارروائي ڪئي وڃي ۽ سندس سامان کيس واپس ڏياريو وڃي۔